Astanada Shahmat akademııasy ashylady
Juma, 6 shilde 2012 8:24
Keshe Astanada Elbasy Nursultan Nazarbaevtyń qatysýymen jedel shahmat jáne blıs boıynsha álem chempıonattarynyń resmı túrde ashylý saltanaty ótti.
Onyń ashylý rásimine, sondaı-aq, Astana kúnin merekeleýge arnaıy kelgen Qyrǵyz Respýblıkasynyń Prezıdenti Almazbek Atambaev, Halyqaralyq shahmat federasııasynyń prezıdenti Kırsan Ilıýmjınov qatysty.
Juma, 6 shilde 2012 8:24
Keshe Astanada Elbasy Nursultan Nazarbaevtyń qatysýymen jedel shahmat jáne blıs boıynsha álem chempıonattarynyń resmı túrde ashylý saltanaty ótti.
Onyń ashylý rásimine, sondaı-aq, Astana kúnin merekeleýge arnaıy kelgen Qyrǵyz Respýblıkasynyń Prezıdenti Almazbek Atambaev, Halyqaralyq shahmat federasııasynyń prezıdenti Kırsan Ilıýmjınov qatysty.
Shahmattyń bul túrlerinen álemdik dodalardyń tuńǵysh ret dúnıe júzi boıynsha Astana kúni qarsańynda ótkizilýi kezdeısoq tańdalyp alynǵan joq, olar ala taqta oıyndarynyń ishindegi eń qyzyqty jáne tartymdy túrlerine jatady.
Ashylý saltanatynda Memlekettik ánuran oınalyp bolǵan soń, Elbasy N.Nazarbaevqa sóz berildi. Memleket basshysy jarysqa qatysýshylardy Astana kúnimen jáne álem chempıonattarynyń ashylý rásimimen quttyqtap, jarystyń máni men mańyzyna qysqasha toqtalyp ótti.
– Bizdiń elimizde Astana kúni qarsańynda shahmattyń jedel, ıaǵnı rapıd jáne blıs túrlerinen álem chempıonattarynyń ótkizilýin úlken oqıǵa deýge bolady, – dedi N.Nazarbaev. – Bul jarysqa álemniń myqty shahmatshylary, grossmeısterleri qatysýda. Shahmat oıynynyń bul túrleri óziniń aty aıtyp turǵandaı, adamnyń tez oılap, tez júris jasaýyna, matematıkalyq qabiletin kórsetýine múmkindik beredi. Jalpy, biz shahmattyń jedel túrinen jáne blısten álem chempıonattarynyń Astanada ótýine rızashylyǵymyzdy bildiremiz.
Elbasy odan ári osynaý jarysqa, Astana kúnin qarsy alýǵa kórshiles Qyrǵyz Respýblıkasynyń Prezıdenti Almazbek Atambaevtyń arnaıy kelip otyrǵanyn aıtyp, baýyrlas, túbi bir túrki tildes eldiń basshysyna da rızashylyǵyn bildirdi. Sonymen birge, sharaǵa arnaıy qatysýǵa kelgen Halyqaralyq shahmat federasııasynyń prezıdenti Kırsan Ilıýmjınovtiń 1 500 jyldyq tarıhy bar zııatkerlik oıyndy damytýda atqaryp kele jatqan jumysyn joǵary baǵalap, qaı kezde bolmasyn FIDE prezıdentin qyzmet babynda qabyldaǵanda onymen elimizde shahmatty damytýda atqarylyp jatqan jumystarmen oı bólisetinin, Astanada búginnen bastap resmı túrde ashylatyn álem chempıonattarynyń sondaı kezdesýden bastaý alǵanyn atap kórsetti.
«Qazirgi kezde bizdiń el – Halyqaralyq shahmat federasııasynyń belsendi músheleriniń biri. Qazaqstan táýelsizdik alǵan kezden beri FIDE-men tyǵyz baılanysta jumys istep, qazirdiń ózinde birlesip kóptegen jumystar atqarýda. Búginde elimizde kóptegen jarystar ótkizilip, jastarymyz halyqaralyq týrnırler men jarystarǵa jıi qatysýda. Sonyń nátıjesinde, qyz balalar men er balalar arasynda álem chempıonattarynda top jaryp júrgenderi barshylyq», – dedi Elbasy. Odan ári Memleket basshysy aldaǵy ýaqytta elimizde shahmat mektebin qalyptastyryp, al Astanany shahmat astanasy jasaýǵa jumys isteletinin atap ótti. Osy oraıda Elbasy bolashaqta Astanada Shahmat akademııasy men mektebi, saraıy salynatynyn málimdedi.
Elbasynyń sózinen keıin FIDE prezıdenti Kırsan Ilıýmjınov sóz alyp, Astanada rapıd pen blısten álem chempıonattarynyń ótkizilýi máni men mańyzy jaǵynan úlken oqıǵa ekenin, shahmattyń osy túrleriniń birinen keıin biriniń bir elde, bir qalada ótýi tarıhta eshbir jerde, eshqashan bolmaǵanyn nazarǵa saldy. FIDE basshysy qazirgi kúni Halyqaralyq shahmat federasııasyna álemniń 177 eliniń múshe bolyp tabylatynyn, onymen 600 mıllıondaı adam aınalysatynyn aıtyp, endi Qazaqstanda bolashaqta Shahmat akademııasy men mektebi, saraıy ashylsa, ala taqta oıynymen aınalysýshylardyń budan da kóbeıetinine senimdiligin bildirdi.
Osydan keıin Elbasy ortadaǵy shahmat taqtasyna kelip, «e 2 – e 4» júrisin jasap, álem chempıonattaryn resmı túrde ashty.
Saltanatty sharada jarysqa qatysýshylardyń kezektiligi men oınaıtyn tústeri anyqtalyp, fınalǵa shyqqan shahmatshylardyń arasynda jerebe tastaý rásimi ótti. Ashylý rásimi aldynda aıaqtalǵan irikteý týrnırinde grossmeısterlerge qosylatyn taǵy 6 qarsylas anyqtaldy. Blıs boıynsha fınalǵa Dmıtrıı Andreıkın, Le Kvan Lem jáne Nıkolaı Chadaev shyqsa, rapıdte Igor Kýrnosov, Alekseı Dreev jáne Vladıslav Tkachev joldama aldy.
Jedel shahmat jáne blıs boıynsha álem chempıony ataǵy úshin álemniń tanymal grossmeısterleri Magnýs Karlsen, Borıs Gelfand, Sergeı Karıakın, Veselın Topalov, Vasılıı Ivanchýk, Teımýr Radjabov, Aleksandr Grıshýk jáne basqa qatysýshylar baq synasady. Qazaqstan namysyn rapıd boıynsha Mýrtas Qajyǵalıev pen Ánýar Ismaǵambetov, blıs boıynsha Pavel Kosýr men Rınat Jumabaev qorǵaıdy.
Astanadaǵy jedel shahmat boıynsha álem chempıonatyn belgili tóreshiler baqylaıdy. Aǵa tóreshi qyzmeti Andjeı Fılıpovıchke (Polsha) júktelip otyr. Bas tóreshiniń orynbasary – qazaqstandyq Sergeı Iýrovskıı.
Álem chempıonattarynyń jalpy júlde qory 400 myń AQSh dollaryn quraıdy.
Búginde jarystar shahmat áýesqoılary men kásipqoılarynyń nazaryn ózine aýdarýda. Biz rapıd pen blıs boıynsha jańa álem chempıondarynyń esimin 10 shilde kúni biletin bolamyz. Matchtyń birinshi partııasy 6 shilde kúni Astana ýaqyty boıynsha 15-00-de ótedi. Jarystar keshe «Radisson SAS» qonaq úıinde bastaldy.
Álem chempıonattarynyń barlyq jańalyqtary www.worldchess.kz arnaıy saıtynda jarııalanatyn bolady
Dastan KENJALIN,
«Egemen Qazaqstan».
