«Qoldanystaǵy tetikterge egjeı-tegjeıli taldaý júrgizildi, osal jerler anyqtaldy, aǵymdaǵy qyzmettiń tıimsizdik sebepteri belgilendi. Qazirgi ýaqytta memlekettik organdar men uıymdar arasyndaǵy is-qımyldardy jalpy úılestirý joq. Investısııalyq klımatty qalyptastyrýmen mınıstrlikter, ulttyq kompanııalar, ákimdikter jáne basqalar aınalysady. Biraq olardyń arasynda baılanys joq», dedi Á.Smaıylov.
Budan soń ol Astana halyqaralyq qarjy ortalyǵynda jasalǵan quraldar paıdalanylmaıtynyn atap ótti.
«Álemdik ınvestısııalyq qoǵamdastyq úshin túsinikti formatta rásimdelgen jáne usynylǵan tartymdy jobalardyń sany jetkiliksiz. Eldiń ınvestısııalyq ımıdjin shetelde ilgeriletý jónindegi jumys tıisti deńgeıden áli alys. Osy júıeli problemalardy sheshý úshin juma kúni (2019 jylǵy 19 sáýirde) Jumys tobynyń usynystary negizinde Úkimet «Qazaqstan Respýblıkasyna sheteldik ınvestısııalar tartý jónindegi sharalardy kúsheıtý týraly» qaýly qabyldady. Osy qaýlymen shyn máninde ınvestısııalar tartý boıynsha jumystyń jańa arhıtektýrasy jasaldy», dedi ol.
Onyń aıtýynsha, bul elimizdegi ınvestısııalyq qyzmettiń jaǵdaıyn sapaly túrde jaqsartý úshin serpin bolmaq.
«Jańa arhıtektýrada Premer-Mınıstrdiń tóraǵalyǵymen ınvestısııalar tartý máseleleri jónindegi úılestirý keńesi erekshe ról atqaratyn bolady. Oǵan strategııalyq ınvestısııalyq jobalardy iske asyrýdyń erekshe sharttaryn usyný jónindegi ókilettikter zańnamalyq deńgeıde bekitiletin bolady. Bul ınvestısııalyq jobalardy tıimdi iske asyrý úshin qajetti sheshimderdi tez jáne jedel qabyldaýǵa múmkindik beredi», dedi mınıstr.
Mınıstrliktiń aqparatyna sáıkes, keńes quramyna Qazaqstan Respýblıkasy Premer-Mınıstriniń birinshi orynbasary, Qazaqstan Respýblıkasy Premer-Mınıstriniń ınfraqurylymdyq damý máseleleri jónindegi orynbasary, negizgi mınıstrlikterdiń (ádilet, syrtqy ister, ulttyq ekonomıka, ındýstrııa jáne ınfraqurylymdyq damý, energetıka, aýyl sharýashylyǵy, ishki ister), Astana halyqaralyq qarjy ortalyǵynyń, Ulttyq basqarýshy holdıngterdiń, ulttyq kompanııalardyń, «Atameken» ulttyq kásipkerler palatasynyń birinshi basshylary, sondaı-aq Joǵarǵy Sottyń, Bas Prokýratýranyń jáne Ulttyq qaýipsizdik komıtetiniń basshylary kirdi.
«Investısııalar jónindegi Ombýdsmen bolyp Qazaqstannyń Premer-Mınıstri taǵaıyndalǵanyn atap ótý mańyzdy. Astana halyqaralyq qarjy ortalyǵy ınvestısııalardy tartý jáne Qazaqstan Respýblıkasynyń ınvestısııalyq ımıdjin ilgeriletý jónindegi jumysty úılestirý boıynsha biryńǵaı ortalyq bolyp aıqyndalatyn bolady. Ol О́ńirlik ınvestısııalyq hab bolady», dedi Á.Smaıylov.
