Qoǵamdyq qabyldaýda mınıstr segiz adamnyń únine qulaq túrip, bárine tushymdy jaýap qaıtardy. Onyń ishinde eki azamat óńirlerden onlaın rejiminde baılanysqa shyǵyp, saýaldaryn tikeleı joldady.
Aldymen Almaty qalasynan jýrnalıst Bıbigúl Dáýletbekqyzy keıingi kezde áleýmettik jelilerde kóp talqylanǵan birneshe máseleni kóterdi. Jýrnalıst reıtıng qýalaǵan baǵdarlamalarǵa, sonyń biri «О́z oıym» baǵdarlamasyna qatysty sóz qozǵady. Onyń aıtýynsha túski 15:00-de efırge shyǵatyn baǵdarlama tálim-tárbıege jat, uıatty taqyryptardy kóterip, oǵan áleýmettik jelilerde biraz jurt qarsylyq tanytqan. Mundaı baǵdarlamalardyń qatarynda «Kel, kelinim», «Qalaýlym» baǵdarlamalary bar ekenin aıtty.
Mınıstr bul saýalǵa «Osyndaı taqyryptardyń qoǵamdyq talqyǵa túskeni siz ataǵan baǵdarlamalardyń budan keıin kóbeımeýine yqpal etedi. Biz zańǵa qaıshy keletin kontent bolǵanda ǵana mundaı baǵdarlamalardy jaba alamyz. «О́z oıym» baǵdarlamasy – jeke telearnanyń qaramaǵynda. Bir tarap osyndaı baǵdarlamalardyń jabylýyn surasa, ekinshi tarap sóz bostandyǵyn shektedi dep qynjylys bildiredi. Munda bastysy kórermenderdiń tańdaýyna qaraý kerek. О́ıtkeni atalǵan baǵdarlamalardyń qaralymy mıllıonnan asady. Iаǵnı reıtıng máselesi kóptiń suranysynan týady. Bul túıtkildi saýaldar boıynsha arna basshylarymen, baǵdarlama jetekshilerimen kezdesip, kelissózder júrgizdik. Qazir maǵan «Qalaýlymnyń» beti beri qarap kele jatqanyn aıtty. Sol sııaqty «О́z oıym» da birte-birte qalypqa keledi dep oılaımyn» dep jaýap berdi. Sondaı-aq budan bylaı efırde ruqsatsyz, balalardyń betin búrkemeı kórsetse, ákimshilik jaza qoldanylatynyn jáne teledıdardan, áleýmettik jelilerden kishkentaılardyń qandaı dúnıelerdi kóretinine ata-analar da jaýapkershilikpen qaraý kerektigin aıtty.
Ekinshi suraq ta onlaın túrinde Batys Qazaqstan oblysynan joldandy. Jańaqala aýdany, Qyzyloba aýyldyq okrýgi aqsaqaldar keńesiniń tóraǵasy Tabyldy Masatovty óńirde Qazaq radıosynyń stansasy joqtyǵy alańdatady eken. О́ıtkeni kózi nashar kóretin nemese múldem kórmeıtin turǵyndar jańalyqtarǵa radıo arqyly qanyqqysy keledi.
D.Abaev bul másele nazarda ekenin, Keńes ókimeti kezinen beri qozǵalyp kele jatqanyn jáne onyń birtindep sheshiletinin jetkizdi. Onyń aıtýynsha, 2018 jyly Almaty oblysy men Túrkistan oblysynda radıostansalar túgel ornatyldy. Endi bul másele Batys Qazaqstan oblysynda bıyl jáne kelesi jyly tolyq sheshimin tabady.
Osydan keıin Aqparat jáne qoǵamdyq damý mınıstri Nur-Sultan qalasy turǵyndarynyń ótinishin zeıin qoıyp tyńdady. Sonyń biri «Active life» múgedekter qoǵamdyq birlestiginiń prezıdenti Arnur Iskakov ózi Youtube jelisinde múmkindigi shekteýli jandarǵa arnap túrli taqyrypta arna júrgizetinin jáne aldaǵy ýaqytta ónerge áýes qamkóńil jandar úshin arnaıy baǵdarlama jasap, kontent qalyptastyrýdy qoldaýyn surady.
Buǵan D.Abaev «Áleýmettik álsiz toptarǵa bólektep baǵdarlama jasaý qanshalyqty qajet? О́ıtkeni ınklıýzıvti degenniń ózi ondaı jandardy qoǵamnan oqshaýlamaı biriktirý, balalardyń bári birdeı degen sóz emes pe?! Biraq mundaı baǵdarlamalardyń bizde birnesheýi bar. Sizdiń usynystaryńyzdy da qarap kóremiz» dep jaýap qatty.
Sonymen qatar Natalıa Temirjanova esimdi qala turǵyny «Uly dalanyń eki qalasy» atty beınesıýjet ázirleýge jáne «The Brain media group» JShS dırektory Sergeı Selıshev telearnada jańa baǵdarlamalar jasaýǵa qoldaý surady. Bulardyń tilekterin mınıstr qaǵazǵa túrtip alyp, nazarda ustaıtynyn jetkizdi.
Al Aınur Nurymova jastar arasynda aıtys uıymdastyrý týraly usynys bildirse, Sherhan Jeńis hıp-hopty damytýǵa demeý kórsetýdi ótindi. D.Abaev muny uıymdastyrý Mádenıet jáne sport mınıstrliginiń enshisinde ekenin, degenmen telejoba retinde ótkizýge qanshalyqty jaraıtynyn qarastyryp kóretinin aıtty.
