Kezdesý barysynda Qazaqstan men Reseıdiń kólik-logıstıkalyq júıeleri arasyndaǵy yntymaqtastyqty odan ári tereńdetý jáne keńeıtý, birlesken tranzıttik áleýetti damytý jáne jolaýshylar men júk tasymaldaýdyń tıimdiligin arttyrý máseleleri qaraldy.
«RTJ» AAQ bas dırektory O. Belozerov qazaqstandyq áriptestermen ózara qarym-qatynas reseılik temir jol júıesi úshin asa mańyzdy ekenin atap ótti. Elder arasyndaǵy júk tasymaly sońǵy ýaqytta aıtarlyqtaı ulǵaıdy.
«Osy jyldyń qańtar–naýryz aılarynda tranzıttik tasymaldar ótken jyldyń sáıkes kezeńimen salystyrǵanda 51%-ǵa artty, jáne biz yntymaqtastyqty keńeıte túsýge nıettimiz», — dedi O. Belozerov.
2018 jyly Qazaqstan men Reseı arasyndaǵy júk tasymaldaý kólemi 2017 jylmen salystyrǵanda 467,7 myń tonnaǵa artyp, 85,4 mln tonnany qurady. Bıylǵy I toqsannyń qorytyndysy boıynsha júk tasymaldarynyń kólemi 21 mln tonnany qurady.
QR Premer-Mınıstri A. Mamın Qazaqstannyń ózara tıimdi sharttarmen syndarly yntymaqtastyqty keńeıte túsýge nıetti ekenin atap ótti. Sonymen birge, QR Úkimetiniń basshysy «Bir beldeý, bir jol» jobasynyń aıasynda eki eldiń temir jol júıeleriniń birlesip qatysýynyń úlken áleýetin aıtyp ótti.
Jalpy alǵanda, taraptar qazirgi ózara is-qımyldy nyǵaıtýdy jalǵastyrýǵa jáne yntymaqtastyqtyń jańa birlesken baǵyttaryn iske asyrý jónindegi jumystardy jandandyrýǵa nıet bildirdi.
