Aıtys aldymen óńirdiń aýdandary men qalalarynda ótip, oblystyq deńgeıdegi sóz saıysyna iriktelgen 20 jas aqyn qatysty. Jyr báıgesiniń jyl saıyn jańalyǵy da bolyp otyrady. Sondaı jańa esimder juldyzdaı jarqyrap, bıyl da kórindi.
Sóz óneriniń máıegine sýsaǵan Uzynkól jurtshylyǵynyń aıyzyn qandyrǵan aıtysta qazylar alqasy úshinshi júldeni Sarykól aýdanynyń úkilegen úmiti Qundyz Adyrbaeva men tarandyq Erkebulan Ásetke, Qostanaı aýdanynan Dosbol Mysyrǵa bóldi. Ekinshi orynǵa Uzynkól aýdanynan Aqjúnis Júrsin men Taran aýdanynan kelgen Bekzat Rátbek laıyq dep sheshti. Kórermenniń nazaryn áp degende ózine aýdarǵan meńdiǵaralyq Ǵanımat Naǵashybaı birinshi oryndy aldy. Al bas júldege qazylar alqasynyń da, kórermenniń de qalaýy Jankeldın aýdanynyń tas túlegi Bekzat Baýyrjanǵa tústi.
«Oqýshylar aıtysy oblysta 27 jyldan beri úzilmeı ótip keledi. Búgingi jas urpaq qazaqtyń kıeli sóz ónerin tushynýy, qazaqtyń baı tiliniń qazynasynan sýsyndaýy úshin mundaı shara kerek. Tulpardy taı kezinen jetelemese, baptamasa ol báıgeniń aldyn, máreni kespes edi. Aıtys ta solaı. Jyl saıyn balalardyń aýzynan jarq etken jaqsy shýmaqtar, oralymdy oılar estip, qýanyp otyramyz» deıdi oqýshylar aıtysynyń qazylar alqasyn 27 jyl boıy basqaryp kele jatqan jazýshy Ǵumar Ahmetchın.
Oqýshylar aıtysyna bala kezinde qatysqan, búginde belgili aıtys aqyny, jýrnalıst, jyrshy bolyp qalyptasqan Saltanat О́telbaeva men Qydyrbek Qıysqan ózderi osy sharany ótkizýge, onyń úzilmeı jalǵasýyna atsalysyp júr. Osy joly olar aıtystyń qazylar alqasynyń múshesi boldy.
Qostanaı
