Forýmǵa eki eldiń bılik organdary men iskerlik ortanyń 150-den asa, onyń ishinde 100-ge jýyq vengerlik bıznes ókili jınaldy.
«Forým eki el arasyndaǵy tikeleı iskerlik baılanysty jolǵa qoıýdyń utymdy mehanızmine aınaldy. Vengrııa – Qazaqstannyń Eýropadaǵy asa mańyzdy saýda-ekonomıkalyq jáne ınvestısııalyq áriptesiniń biri. Biz ekijaqty ekonomıkalyq ózara is-qımyldyń óristeý tendensııasyn joǵary baǵalaımyz. Vengrııa kásipkerleriniń bizdiń elimizben ózara tıimdi yntymaqtastyq ornatýǵa degen qyzyǵýshylyǵy barǵan saıyn kúsheıe túsýde», dedi Ulttyq ekonomıka mınıstri Rýslan Dálenov.
Forým saýda jáne ınvestısııalyq ózara is-qımyldy talqylaýdaǵy mańyzdy basqosýǵa aınalǵan. Munda ekonomıkanyń túrli salasy qamtylyp, ekijaqty yntymaqtastyq jobalaryna jol ashylady.
Rýslan Dálenov qazaqstandyq-vengerlik saýda-ekonomıkalyq jáne ınvestısııalyq yntymaqtastyqty damytýdyń bolashaǵyna baǵa bere kelip: «Qazaqstan Vengrııanyń TMD elderiniń ishindegi 4-iri saýda áriptesi. Eki el arasyndaǵy 2018 jylǵy taýar aınalymynyń kólemi – 139 mln AQSh dollary. Bul rette jemisti yntymaqtastyqqa ákeletin barlyq shart jasalǵan. Qazaqstandyq-vengerlik Strategııalyq keńes, Ekonomıkalyq yntymaqtastyq jónindegi úkimetaralyq komıssııa, Iskerlik keńes, Atom energııasy jónindegi jumys toby men Tikeleı ınvestısııalardyń birlesken qory tabyspen jumys isteýde», dedi.
Forým baǵdarlamasy boıynsha qazaqstandyq jáne vengerlik kásipkerlerdiń arasynda birqatar ekijaqty kezdesýler ótedi. Taraptar agroónerkásiptik keshen, jeńil jáne tamaq ónerkásibi, qurylys, hımııa jáne mashına jasaý salasyndaǵy yntymaqtastyq máselesin talqylaýdy josparlap otyr.
Sonymen qatar, bıznes-forýmnyń barysynda Qazaqstan Respýblıkasynyń Ulttyq ekonomıka mınıstrligi men Vengrııa Syrtqy ister jáne saýda mınıstrliginiń arasyndaǵy ekonomıkalyq yntymaqtastyq jónindegi ózara túsinistik týraly memorandýmǵa qol qoıyldy.
