Saılaý • 30 Sáýir, 2019

Bas qalada «El júregi – Nur-Sultan daýys beredi» aksııasy bastaldy

1090 ret

kórsetildi

1 mın

oqý úshin

Búgin Nur-Sultanda turǵyndardyń saılaýshylyq belsendiligin arttyrýǵa baǵyttalǵan «El júregi – Nur-Sultan daýys beredi» atty qalalyq aqparattyq-áleýmettik aksııa bastaldy, dep habarlaıdy elorda ákimdiginiń resmı saıty.

Qarlyǵash QURAMYS

Bas qalada «El júregi – Nur-Sultan daýys beredi» aksııasy bastaldy

Uıymdastyrýshylardyń málimetine súıensek, qoǵamdyq naýqan Facebook jáne Instagram áleýmettik jelisinde ótkiziledi. Munda turǵyndardyń QR Prezıdentin kezekten tys saılaýynda daýys berýge qatysýyn belsendetý boıynsha materıaldardy jarııalaýǵa arnalǵan arnaıy taqyryptyq «Elorda Live» paraqshalary ashyldy.

Máselen, Facebook paraqshasynda qalanyń ár turǵynynyń 2019 jyldyń 9 maýsymynda ótetin Prezıdent saılaýyn qoldaý maqsatynda qyzyqty oqıǵalardy, jarııalanymdy nemese beınerolıkti #MenBolashaqtytańdaımyn jáne #Senińdaýysyńmańyzdy, #Saılaý2019 heshtegimen belgilep, osy jerde jarııalaı alatyndyǵy atalyp kórsetilgen.

Budan bólek, aksııa aıasynda, adamdar kóp keletin qoǵamdyq oryndarda jastardyń qatysýymen buqaralyq sharalar uıymdastyrylyp, ár aýdandaǵy saılaý ýchaskeleri men daýys berý oryndary týraly tolyqqandy aqparat beretin promo-taqtalar ornalastyrylatyn bolady.

Eske salaıyq, QR Prezıdentiniń Jarlyǵymen QR Prezıdentin saılaý 2019 jyldyń 9 maýsymyna belgilengen bolatyn.