Halyqqa yńǵaıly qyzmet kórsetý úshin atalǵan qabyldaý oryndaryna 150 adamǵa deıin jumyldyrylyp, sáýir aıynda 14 myńnan astam turǵynnan ótinish qabyldaǵan. Nátıjesinde 6 myńǵa jýyq otbasyǵa qarjylaı kómek taǵaıyndalǵan. Byltyr Shymkentte 10 myńnan astam otbasy ataýly áleýmettik kómek alǵan. Bıyl bul kórsetkishtiń sany arta túspek.
Memleket tarapynan berilgen áleýmettik kómekke alǵashqylardyń biri bolyp 7 balanyń anasy Mamrahan Bekmetova ıe boldy. Qýanyshy qoınyna syımaǵan ana bul qarjyny kúnkóristi jaqsartýǵa jumsaıtyndyǵyn aıtyp, qujattaryn esh qıyndyqsyz qabyldaǵan jumyspen qamtý ortalyǵynyń mamandaryna alǵys bildirdi.
«Shymkent qalasy boıynsha ataýly áleýmettik kómekke ótinish bildirgen otbasylardyń sáýir aıynda tapsyrǵan qujattarynyń barlyǵy qamtylady. Sonymen qatar qala turǵyndarynyń áleýmettik kómek ala almaı qalamyn degen kúdigin týdyrmaý úshin ótinish bildirgen otbasylardyń is-qaǵazdaryn tolyqqandy zań aıasynda qarap, nazarǵa alamyz», deıdi Shymkent qalasy ákiminiń orynbasary Gúljan Qurmanbekova.
Kópbalaly analar men áleýmettik az qamtylǵan otbasylar ataýly áleýmettik kómekke qaralǵan qarajat barlyǵymyzǵa birdeı jetpeıdi, dep alańdaǵan bolatyn. Alaıda sala jaýaptylary Elbasy tapsyrmasymen bólingen qarjylaı kómektiń jetkilikti ekendigin aıtyp, kómekke zárý turǵyndardyń alańdaýyna esh negiz joq ekendigin túsindirdi.
