Medısınalyq poıyzdar negizinde kórsetiletin qyzmetter «Áleýmettik medısınalyq saqtandyrý qory» KEAQ tarapynan qarjylandyrylady. Dástúrli jobany «Qazaqstan temir joly» UK» AQ men «Samruk-Kazyna Trust» áleýmettik jobalardy damytý qory birlesip júzege asyrady.
«Densaýlyq» poıyzy Atyraý, Mańǵystaý, Qyzylorda, Túrkistan, Almaty, Batys Qazaqstan, Qaraǵandy, Soltústik Qazaqstan oblystary aýmaǵyndaǵy 195 stansııaǵa aıaldaıdy. Sapar barysynda barlyǵy 40 myńǵa jýyq adamǵa medısınalyq kómek kórsetý josparlanyp otyr.
Sońǵy úlgidegi qondyrǵylarmen jabdyqtalǵan poıyzdarda kórsetiletin medısınalyq kómek tiziminde: salalyq mamandardyń keńesi (terapevt, pedıatr, nevropatolog, okýlıst, LOR, gınekolog, hırýrg, ýrolog, mammolog, onkolog t.b.), túrli zertteýler men dıagnostıka túrleri (ÝDZ, qan taldaýlary, flıýorografııa t.b.), kishigirim hırýrgııalyq operasııalar men stomatologııalyq qyzmetter t.b. bar.
Bıyl densaýlyq salasy qyzmetkerlerimen birge Medısınalyq saqtandyrý qory qyzmetkerleri de jolǵa shyqpaq. Ondaǵy maqsat – stansııalardyń turǵyndaryna mindetti áleýmettik medısınalyq saqtandyrý júıesi jaıly jan-jaqty málimet berý. Sebebi, bul Qazaqstandaǵy árbir turǵynǵa qatysy bar, mańyzdy reforma. Sondyqtan da Qor azamattardyń saqtandyrýǵa qatysty suraqtaryna jaýap beretin núkteler sanyn arttyryp, konsýltasııalardy jetildire túsýge den qoıyp otyr.
Konsýltasııalar barysynda shalǵaı eldi mekenderdiń turǵyndary MÁMS júıesiniń artyqshylyqtary, kepildendirilgen tegin medısınalyq kómek jáne mindetti áleýmettik mnedısınalyq saqandyrý paketteri sheńberinde kórsetiletin qyzmetter, saqtandyrý jarnasynyń mólsheri, Biryńǵaı jıyntyq tólemdi tóleý tártibi, memleket tarapynan saqtandyrylatyn sanattar jaıly tolyq málimet ala alady.
Esterińizge sala ketsek, Medısınalyq saqtandyrý qory memlekettik tapsyrys boıynsha kórsetiletin kepildendirilgen tegin medısınalyq kómek (TMKKK) paketiniń jáne jumys berýshiler, azamattar men memleket jarnasy esebinen qarjylandyrylatyn MÁMS paketiniń operatory bolyp tabylady. Tegin medısınalyq kómek paketin qarjylandyrý mindeti 2018 jyldan bastap Qorǵa júktelgen bolatyn. Al, mindetti saqtandyrý sheńberinde qyzmet kórsetý 2020 jyldan bastalady.
Poıyzdyń kestesi fms.kz saıtynda jarııalanǵan.
