Onyń aıtýynsha, mundaı qyzmetterdi barlyq medısınalyq uıymdar kórsetpeıdi. Bul úshin tıisti kadr áleýeti jáne materıaldyq-tehnıkalyq baza bolýy qajet. Mysaly, bul — búırek, uryq jasýshalaryn transplantasııalaý, súıek ótkizgishtigin ımplantasııalaý. Qoǵamdyq densaýlyq saqtaý komıteti ólshemderge sáıkestigine baılanysty ruqsat beretin joǵary tehnologııalyq qyzmetter bar. Odan keıin, Medısınalyq áleýmettik saqtandyrý qorymen kelisimshart jasasqannan keıin bul qyzmet tegin kórsetiledi.
«Bizde joǵary tehnologııalyq medısınalyq qyzmetter kólemin arttyrýdyń oń úrdisi baıqalady. Eger jyldyq kórsetkishterdi salystyrsaq, 2016 jyly 71 myńǵa jýyq adam joǵary tehnologııalyq medısınalyq qyzmet alsa, al ótken jyly bul kórsetkish 105 myń adamdy qurady», — dedi vıse-mınıstr.
Sonymen qatar, onyń aıtýynsha, medısınalyq uıymdar joǵary tehnologııalyq medısınalyq qyzmetterdi kórsete bastasa, olar kvota joq mamandandyrylǵan medısınalyq kómek kategorııasyna óte alady, ıaǵnı kólemi boıynsha shekteý joq. Bul rette, lımıtter halyqtyń suranystaryna baılanysty belgilenedi.
«Eger osy tehnologııalarǵa qajettilik bolsa, mysaly, myńdaǵan naýqas endoprotezdeýge muqtaj bolsa, onda ótken jyldary kórsetiletin qyzmetterdiń ótkendegi kólemi qadaǵalanyp, halyq sanynyń ósýin eskere otyryp, qansha adamǵa kómek kórsetilýi kerek bolatyny esepteledi. Iаǵnı, belgili bir qyzmetterdi shekteý kezinde mindetti túrde turǵyndardyń osy tehnologııaǵa suranysy eskeriledi», — dep naqtylady L. Aqtaeva.
