Áýelgide óńirdegi jas qalamgerlerdiń basyn qosyp, ortaq shyǵarmashylyq aýdıtorııa qalyptastyrý maqsatynda «Rýhanı jańǵyrý» baǵdarlamasy aıasynda bastaý alǵan forým bıyl «Jastar jylymen» ushtasty. Sondaı-aq forýmdy uıymdastyrǵan Almaty oblysynyń tilderdi damytý jónindegi basqarmasy osy jolǵy «Jetisý kóktemin» Kegen aýdanynyń aýmaǵyndaǵy tabıǵat jaýhary – Kólsaı mańynda, Saty aýylynda qarsy alýdy uıǵarypty. Eki kúnge sozylǵan sharada jetisýlyq qyryqtan astam jas ádebıetshiler men tilshiler oı-pikir almasyp, ádebı sheberlik mektebinen ótti.
Forýmnyń alǵashqy kúni qatysýshylar «Kólsaı kólderi» ulttyq tabıǵı parki memlekettik mekemesiniń ǵımaratynda seksııalyq otyrystarǵa qatysty. Seksııalyq jumysqa sáttilik tilegen oblystyq tilderdi damytý jónindegi basqarma basshysy Aıdar Bashbaev óńirdiń jas ádebıetshileri men tilshilerine Almaty oblysyndaǵy ádebıetti qoldaý men memlekettik tildiń qoldanys aıasyn keńeıtýge oraı atqarylǵan isterge toqtaldy. Seksııalyq otyrystyń ózi de osy eki taqyryp aıasynda jalǵasty. Munda forýmǵa qatysýshy jas tilshiler men qalamgerler óz oılaryn ortaǵa salyp, jas aqyndar óleń oqydy.
- О́tken jyly Elbasynyń «Bolashaqqa baǵdar. Rýhanı jańǵyrý» baǵdarlamalyq maqalasynyń negizinde «Jetisý kóktemi» ádebı forýmynyń tusaýyn kesken bolatynbyz. Taldyqorǵan qalasynda ótken tuńǵysh forýmda elimizdiń birneshe oblysynan qonaqtar kelip, jas qalamgerlerdi Qazaqstan Jazýshylar odaǵynyń músheligine qabyldaý saltanaty ótken edi. Osy shara jastardyń shyǵarmashylyǵyna serpin berip, jańa ádebı orta qalyptasýǵa jol ashqanyn baıqadyq. Bıyl jaqsy isti nege jalǵastyrmasqa dep sheshtik. Ári bıyl forýmnyń qalybyna azdaǵan ózgeris engizip, tek aqyn-jazýshylardy ǵana emes, aýdandardaǵy betke ustar belsendi jastardy da jınadyq. Ásirese, ózge etnostar ókilderiniń arasynda qazaq tilin erkin meńgergen jastardy da ortamyzǵa qostyq. Bul qoǵamdaǵy ádebıettiń órkendeýi men memlekettik tildiń damýyna jol ashady, - deıdi Almaty oblystyq tilderdi damytý jónindegi basqarmasynyń basshysy Aıdar Bashbaev.
Ádebı sharanyń ekinshi kúni Saty aýylyndaǵy Mádenıet úıinde jalǵasty. Qatysýshylar men qonaqtar aldynda baıanda jasaǵan oblystyq tilderdi damytý jónindegi basqarma basshysy Aıdar Bashbaev aımaqtaǵy tildik ahýalǵa da toqtalyp, elimizdiń latyn negizdi álipbıge kóshý barysyndaǵy mańyzdy jumystardy da tilge tıek etti. Basqarma basshysynyń aıtýynsha, oblys turǵyndarynyń 60 prosentten astamy latyn álipbıine kóshýdi qoldap otyr. Oblystyq basqarma arqyly «Latyn álipbıine kóshý – zaman talaby» atty 19 beınerolık jasalyp, ol telearnadan turaqty kórsetilýde. Birqatar aýdandarda tildi oqytý ortalyqtary jumys isteıdi. Aldaǵy kúnderde taǵy 10 aýdanda osyndaı ortalyqtar ashylyp, jumysyn júrgizbekshi. Bul turǵyndardyń latyn álipbıin meńgerýge jasalǵan jaǵdaı.
- «Jetisý kóktemi» jas tilshiler men qalamgerlerdiń forýmy byltyrdan bastaý alǵanyn bilesizder, bıylǵy basqosýdy osynaý kórikti óńirde ótkizýdi uıǵardyq. Bul jas talanttardyń shyǵarmashylyǵyna oń áserin tıgizetin bolady. Jáne búgingi sharanyń birinshi forýmnan basty ereksheligi - bıylǵy basqosýǵa aýdan, qalalardan kelgen jas til janashyrlary men qazaq tilin jetik meńgergen ózge etnos ókilderiniń qatysýy boldy, - dedi óz sózinde Aıdar Karbozuly.
Jastar forýmyna arnaıy kelgen Kegen aýdanynyń ákimi Talǵat Baıedilov kórikti Kólsaı aýmaǵyna kelgen jas qalamgerlerge óńir jaıynda áńgimelep, shyǵarmashylyq tabys tiledi. Sondaı-aq «Jetisý kóktemi» ádebı forýmynda oblystyq «Til» oqý-ádistemelik ortalyǵynyń oqytýshysy Janar Elesbaeva, Qazaqstan Jazýshylar Odaǵy oblystyq fılıalynyń dırektory Erlan Júnis, Uıǵyr aýdandyq «Qaradala tynysy» gazetiniń tilshisi Sabırıam Anvarova, Ile aýdany Qaraoı aýylyndaǵy №18 orta mektep muǵalimi Valentına Talıýs, Kerbulaq aýdanyndaǵy D.Qonaev atyndaǵy orta mekteptiń bastaýysh synyp muǵalimi Kámshat Shynarbaevalar sóz alyp, óz oılaryn ortaǵa saldy. Al jas aqyndar Álııa Ińkárbek, Qozybaı Qurman jáne Muhtar Kúmisbek jyrdan shashý shashty.
Forým jumysyna oraı arnaıy úndeý qabyldaǵan jas ádebıetshiler men tilshiler úshin taǵy bir jaǵymdy jańalyq jarııa boldy. Ol – Almaty oblysy ákiminiń júldesi úshin «Aq qaýyrsyn» ádebı baıqaýynyń jarııalanǵany edi. Bıylǵy «Jastar jylyna» oraı ótetin ádebı baıqaý poezııa jáne proza janrlary boıynsha «Jastar jyrlaıdy» degen ataýmen ótetin boldy.
