Halyq birligi merekesi kúni el azamattary ult pen ulystyń ótken kezeńdegi tarıhy men onyń sabaqtaryn dáriptep, álemdik qoǵamdastyq tarapynan joǵary baǵalanǵan qazaqstandyq tatýlyq pen kelisimdi pash etedi. Elbasy Nursultan Ábishuly Nazarbaev irgetasyn qalaǵan dostyq, tatýlyq ustanymy – búginde Qazaqstannyń ǵana emes, barsha eldiń, álem elderiniń qyzyǵa qarar úlgisine aınalyp keledi.
Elimizdiń basty qorǵaýshy kúshi qoǵamdyq kelisim men etnosaralyq tatýlyqty saqtaý – Qazaq eliniń aldynda turǵan basty mindet. Qoǵamdyq kelisim men saıası turaqtylyq – bizdiń eń mańyzdy baılyǵymyz! Bul jetistikti baǵalaý, ony saqtaý jolynda aıanbaı eńbek etý – árbir Qazaqstan azamatynyń mindeti. Sonyń dáleli – kúni keshe Nur-Sultan qalasynda ótken Qazaqstan halqy Assambleıasynyń «Beıbitshilik pen kelisim formýlasy: birlik jáne jańǵyrý» atty XXVII sessııasy. Elbasymyz atap ótkendeı, «Búginde Assambleıa turaqtylyq pen qoǵamdyq kelisimniń senimdi, berik negizi bolyp tabylady».
Sessııada kóterilgen máselelerdiń barlyǵynyń derlik sheshimi tabylady. Barsha qazaqstandyqty Mańǵystaý dalasynyń perzenti retinde kıeli óńirden shyn nıetimmen quttyqtaımyn. Qazaqstan halqynyń dostyǵy jáne birligi kúni qutty bolyp, ár otbasyna, ár qazaqstandyqqa baqyt-bereke syılasyn. Qazaqstan halqy órken jaıyp, memleketimiz molshylyqqa, al árbir shańyraq baqyt pen shattyqqa kenelsin dep tileımiz. Sebebi shańyraq ortaq bolǵan soń, taǵdyr da ortaq, keleshek te ortaq.
Biz – qazaqstandyqtarmyz! Biz ortaq eńbegimizben, birlesken izdenisimizben, toptasqan bolmysymyzben ortaq úıimiz – Qazaqstan Respýblıkasyn kún sanap túletip, kún sanap órkendete túsýdemiz. Biz jáne bizdiń urpaqtarymyz elimizben birge eseıe bermek.
Qurbanalı GAZIBEKOV,
Qazaqstan halqy Assambleıasy «ALA-TOO» qyrǵyz etnomádenı birlestiginiń tóraǵasy
Mańǵystaý oblysy
