Áke-sheshesi onyń ónerge degen qyzyǵýshylyǵyn erte baıqap «Marıchka» syrnaıyn satyp áperedi. Sodan beri mýzykanyń tylsym syryna, ǵajaıyp únine degen ińkárlik, qushtarlyq onyń jan dúnıesin baýrap alýmen qatar otbasyn asyraý kásibine de aınalady. Ekinshi synypta syrnaı tartýdy jete úırenip alǵannan keıin aýyl sahnasynda «Kreıser Avrora» shyǵarmasyn quıqyljyta tartyp, dý qol shapalaqtaýǵa masattanyp ketsem kerek, taǵy da tartaıynshy dep qatty qıylǵanym esimde, degen óner ıesi mýzykalyq aspattar jınaý hobbıine qalaı, qashan bilek sybana kiriskenin taratyp aıtyp berdi. Kúnshilik jerlerge deıin at arytyp baryp tyrnaqtap tolyqtyrǵan kolleksııasynda qazir eki júzge tarta syrnaı, baıan, akkordeon, dombyra, skrıpka, dabyl, daǵyra, kastenet, gıtara sekildi aspaptardyń túr-túri jınaqtalǵan. Aralarynda syıǵa tartylǵandary da bar. Kóbine satyp alady. Dybystalýy, sazy jaǵynan bir-birine uqsamaıtyn qaı-qaısysyn bolsyn ol erkin tarta alady. Qoly epsekti. Synǵandaryn jóndeıdi.
Syrnaılardyń ishinde eń kónesiniń «jasy» bir ǵasyrdan asyp barady. Ony Reseı jaqtan aldyrtqan. Eń qymbattysy, maıdanger aǵasy Ilıadan mura retinde qalǵan. 53 jastaǵy mýzykant búginde oblystan shalǵaı ornalasqan Poltavka eldi mekenindegi mádenıet úıinde jumys isteıdi. Osynda «Hýtorok» balalar ansamblin quryp, jetekshilik etip keledi. Ol mýzykalyq aspaptardyń qulaǵynda oınaıtyn birneshe býyn tárbıelep shyqty.
Jergilikti mýzykant kolleksııasyn tolyqtyryp otyrýdy umytqan emes. Áıgili sheber Vladımır Potehınniń syrnaıyn izdestirip júrgenin jasyrmaıdy. Kókeıge qonaqtaǵan armannyń biri – týǵan aýylynda mýzykalyq aspaptar mýzeıin ashý. Ol úshin arnaıy ǵımarat satyp alypty. Qarajat tabylsa, kúrdeli jóndeýden ótkizip alǵan soń túpki maqsatyna den qoımaq.
Aıtpaqshy, umytyp barady ekenbiz, reseılik ataqty ónerpazdar Zavolokınder otbasy negizin qalaǵan dástúr izimen «Quıqyljy syrnaı, kúmbirle dombyra» mádenı sharasy óńirde jańǵyrtylsa degen usynysy eskerýsiz qalmasa eken degen tilegi bar.
Soltústik Qazaqstan oblysy
