Búgin de Taraz qalasynda Áýlıeata jurtshylyǵy Qazaqstan halqy birligi kúnin dástúrge saı atap ótti. Merekelik sharaǵa óńirdiń zııaly qaýym ókilderi, oblystyq etnomádenı birlestikterdiń músheleri, «Jańǵyrý joly» jastar qozǵalysy jáne «Aq jelken» jastar lıgasynyń músheleri, sonymen qatar, jergilikti ardagerler men analar keńesiniń músheleri, qolóner sheberleri, qala qonaqtary men turǵyndary qatysty. Qazaqstan halqy Assambleıasynyń aımaqtarda etnosaralyq kelisimdi qamtamasyz etýdi júzege asyrý jolynda Qazaqstan halqynyń rýhanı-mádenı birigýi, qazaq elindegi otbasylyq qundylyqtar men dástúrleri damytýdy nasıhattaý, jas urpaqty ár etnostyń salt-dástúrleri men ádet-ǵuryptaryn qurmetteýge baýlý maqsatynda uıymdastyrylǵan shara barysynda jekelegen sahnalarda qazaq, orys, ózbek, ýkraın, uıǵyr, dúngen, túrik, koreı ulttarynyń mádenıeti men salt-dástúrleri týraly qoıylymdar jáne konserttik baǵdarlamalary uıymdastyryldy.
Sonymen qatar, búgin «Dostyq dastarhany» taǵamdar kórmesi uıymdastyrylyp, kópshilik halyq dastarhanǵa qoıylǵan 20 túrli ulttyq taǵamdardan dám tatty. Sondaı-aq, kórermen qaýym arasynda qazaq kúresi, qol kúresi, ordabasy, asyq atý, mas-restlıng, toǵyzqumalaq, láńgi oıyny sııaqty 7 ulttyq sporttyq oıyndar túrinen jarystar uıymdastyryldy. Al, tarazdyqtar jýyrda ǵana ashylǵan «BILIM ALANY» ortalyǵynda jastar men jasóspirimderdiń «Yntymaǵy jarasqan, týǵan ólke – Qazaqstan» atty merekelik qoıylymyn tamashalap, «JASTAR» alańynda uıymdastyrylǵan «Saıaly báıterek» teatrlandyrylǵan kórinisine kýá boldy.
Sonymen qatar, mereke kúni Taraz qalasynyń «JASTAR» alleıasynda ár etnos tilderinde radıodan ánder oryndalyp, alleıanyń basty alańynda óńirlik etnomádenı birlestikterdiń kórkemónerpazdar jetekshileri men shyǵarmashylyq toptarynyń jáne Kenen Ázirbaev atyndaǵy oblystyq fılarmonııa ókilderiniń qatysýymen konserttik baǵdarlama uıymdastyryldy. Ár ult ókilderi ózderiniń ulttyq kıimderin nasıhattap, óz ónerlerin ortaǵa saldy. Birlik kúnine oraı uıymdastyrylǵan merekelik sharada Jambyl oblysynyń ákimi Asqar Myrzahmetov jambyldyqtardy Qazaqstan halqynyń birligi kúni merekesimen quttyqtap, óńirdegi birqatar etnomádenı birlestikterdi Qurmet Gramotasymen marapattady. Sonymen qatar, «Polonez» polıak til ortalyǵy men mádenıeti» qoǵamdyq birlestiginiń múshesi Araksı Pletneva jáne «Aınury» tatar-bashqurt etnomádenı birlestiginiń ókili Rınal Rahmatýllınder de quttyqtaý sóz sóıledi. Budan keıin merekelik sharaǵa qatysýshylar óńirdegi qolóner sheberleriniń eńbekterimen tanysyp, arnaıy uıymdastyrylǵan kórmeni tamashalady.
Jambyl oblysy
