Aıtýly sharany uıymdastyrýshy Dılara Sabyrova festıvaldyń shańyraq kóterýine «117» shyǵarmashylyq stýdııasy bastamashy bolǵanyn, halyqaralyq, respýblıkalyq, aımaqtyq dodalarda olja salyp júrgen bı ujymdarynyń kelgenin, barlyq janrlar, tipti onyń ishinde kóshelik stılder de qamtylatynyn atap kórsetti.
Sahna shymyldyǵy «Toqtamaı bıle» atty áýenmen ashylyp, qımyl-qozǵalystarymen de, kıim úlgilerimen de kózdiń jaýyn alatyn myń buralǵan bıshiler keshtiń kórkin keltirdi.
S.Muqanov atyndaǵy qazaq sazdy-drama teatry janynan 2010 jyly qurylǵan «Alýa» halyq bı ansambline Janna Temirbaeva jetekshilik etedi. Osy ýaqyt aralyǵynda Sochı, Sankt-Peterbýrg, Máskeý qalalarynda óner kórsetip, talaı márte top jarypty. Jarysqa Abhazııada ótetin halyqaralyq saıysqa qatysatyn 2 topty úkilep ákelipti.
Sahnaǵa «Ekspromt» halyq bı teatrynyń sámbi taldaı ıilip turǵan, urshyqsha úıirilgen balǵyndary kóterilgende zal ishin dý qol shapalaq kómip ketti. Bulaı bolatyn jóni bar. Toptyń negizgi jankúıerleri – jas býyn. Sondyqtan bolar qoshemetterin aıamady. Bul joly zamanaýı horeografııaǵa negizdelgen qoıylymdy usynyp, óte sátti shyqty.
«Bı úıirmesine meni atam ertip ákeldi. Birinshi kúni qatty qobaljydym. Biraq jetekshimiz óte jarqyn ári aqkóńil adam bolǵandyqtan, tez til tabysyp kettim. О́mirimdi bısiz elestete almaımyn», deıdi «Ekspromt» halyq bı ansambliniń beldi múshesi Karına Hýsaınova.
