Ony Qazaqstan Respýblıkasynyń Prezıdenttigine kandıdat retinde usynǵan «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýsııalyq zańynyń 55-babyna sáıkes «Halyq demografııasy» qoǵamdyq birlestigi edi. Tıisti qujattarynyń barlyǵy tapsyryldy. Al lıngvıstıkalyq emtıhan barlyq úsh kezeń boıynsha ótti: taqyryp boıynsha jazbasha tapsyrma jazý, mátin oqý jáne lıngvıstıkalyq komıssııa bergen taqyrypqa kópshilik aldynda keminde on bes mınýt sóz sóıleý. Emtıhan tapsyrylǵannan keıin lıngvıstıkalyq komıssııa talqylaý ótkizip, qorytyndylady. Otyrysqa Ortalyq saılaý komıssııasynyń múshesi Lázzát Súleımen qatysty. Sóıtip Qazaqstan Respýblıkasynyń Prezıdenttigine kandıdat retinde tirkelgen Jumataı Álıevtiń memlekettik tildi qanshalyqty erkin meńgergendigi jóninde lıngvıstıkalyq komıssııa múshesi, fılologııa ǵylymdarynyń doktory, professor Ádil Ahmetov aıtyp berdi.
Onyń aıtýy boıynsha, Prezıdenttikke úmitker Jumataı Álıev tıisti ýaqytyń tolyq paıdalanǵan. "Soǵan sáıkes Jumataı Álıev "Memleket jáne din" atty taqyrypty tańdap alyp shyǵarma jazdy. Biraq sol taqyrypty asha almady. О́ıtkeni sóılemderdiń bári júıesiz boldy. Bas-aıaǵy on úsh sóılem, sodan on toǵyz qate jiberdi. Al ereje boıynsha shyǵarmada segiz qate bolsa, ol qabyldanbaıdy. Ústirt jazylǵan. Ekinshi taqyrypqa kandıdat Muhtar Áýezovtyń "Abaı joly" kitabynyń 2-shi tomynan úzindi oqydy. Bul jerde de ol shorqaqtyǵyn taǵy baıqatty. Úshinshi taqyryp retinde "Yrys aldy – yntymaq" atty taqyrypty alyp, baıandama jasady. Bul joly da kandıdat "Yrys aldy – yntymaq" taqyrybyn asha almady. Taǵy da ústirt boldy. Saýatsyz boldy. Sondyqtan komıssııa keńese otyryp, talyqylaı kele Prezıdenttikke úmitker Jumataı Álıev memlekettik tildi erkin meńgermegen degen qorytyndy shyǵardy", dedi.
Al 2019 jylǵy 29 sáýirde Ortalyq saılaý komıssııasyna "Qazaqstan Respýblıkasyndaǵy saılaý týraly" Konstıtýsııalyq Zańnyń 60-babynyń 2-tarmaǵyna sáıkes "Qazaqstan qurylysshylar odaǵy" Respýblıkalyq zańdy tulǵalar birlestiginen Talǵat Faızollauly Erǵalıevti Qazaqstan Respýblıkasynyń Prezıdenttigine kandıdat etip usyný týraly sheshimniń kúshin joıý týraly usynym túsken bolatyn.
