Sóıtip, ıesiz turǵan alańqaı búginde stýdentterdiń demalysyn tıimdi ótkizetin orynǵa aınaldy. Munda alańsyz kitap oqýǵa da, kompıýtermen jumys isteýge de óte qolaıly.
Kitaphana dırektory Ásııa Bısımbaevanyń aıtýynsha, «Rýhanı jańǵyrý» baǵdarlamasyn jáne Jastar jyly aıasynda qurylǵan ortalyqta jan-jaqty aqparat alýǵa barlyq múmkindikter týdyrý maqsatymen zamanaýı tehnıkalar, tegin vaı-faı jelisi ornatylǵan.
Kovorkıng ortalyǵynyń jumysymen tanysqan halyq qalaýlylary onyń búgingi zaman úrdisterine tolyq jaýap beretinin basa aıtty. Elordalyq meımandarǵa ótinish-tilekterin jetkizýshilerdiń biri 3 kýrs stýdenti Aınel Amandyqovany «Serpin» baǵdarlamasy arqyly bilim alyp jatqan ol oqý ordasynda jataqhana máselesiniń ózektiligi tolǵandyratyn bolyp shyqty.
«Tek teriskeı óńirlerde ǵana emes, Qazaqstan boıynsha stýdentterdiń jatyn oryn máselesi qatty sezilip otyr. Qazir bıýdjet naqtylanyp, jataqhanalardy josparlaýǵa, qujattaryn daıyndaýǵa 1 mıllıard teńge qarjy bólindi. Negizinde, bul másele memlekettik-jekemenshik áriptestik aıasynda sheshilýi kerek. Bilim jáne ǵylym mınıstrligi qordalanǵan problemany jylma-jyl sheship otyratyn bolady», dedi Májilis depýtaty Káribaı Musyrman.
Ázirge memlekettik-jekemenshik áriptestik aıasynda SQMÝ-de jataqhana turǵyzýǵa qaltaly qarjyger shyǵa qoımapty. Túıindi jaıt jergilikti jerde sheshimin tappasa, respýblıkalyq múddeli vedomostvolardan kómek suraýǵa týra keletin sekildi.
K. Musyrman keltirgen derekterge súıensek, elimizde «Serpin-2050» baǵdarlamasynyń júzege asyrylýy kóńil kónshitpeıdi. О́ıtkeni, dıplomdy jastardyń kóbi bilim alǵan aımaqtarda jumys isteýge qulyqsyz. Byltyr JOO bitirgen stýdentterdiń 23 prosenti ǵana barǵan jerlerinde turaqtap qalǵan. Al kolledjdi bitirgenderdiń tek 21,4 paıyzy ǵana qalýǵa tilek bildirgen. Endi oqý bitirgen aımaqta jumys isteýge mindetteıtin sharalar qarastyrylýda. Oqyǵan aımaqta jumys isteýge qalǵysy kelmese, 4 jylǵy memlekettik tólem qaıtarylyp alynady.
M.Qozybaev atyndaǵy SQMÝ-de 7 myńnan astam stýdent bilim alsa, solardyń 1 myńnan astamy – «Serpin» baǵdarlamasy boıynsha oqıdy.
