Shara aldynda tarıh jáne arheologııa salasynyń damýyna ólsheýsiz úles qosqan ǵylym qaıratkeri, ulaǵatty ustaz Júrsinǵalı Ahmerovti eske alýǵa arnalǵan dóńgelek ústel uıymdastyryldy. Dóńgelek ústelde sóz alǵan Qorǵanys mınıstri bul sharanyń tárbıelik máni zor ekendigin atap ótti. «Júrsinǵalı Ahmerov bergeninen bereri mol ardaqty ustaz edi. Biz ol kisiniń iskerligin erekshe atap ótkimiz keledi. Aldaǵy ýaqytta biz tarıh ǵylymdarynyń damýyna zor úles qosqan Júrsinǵalı Ahmerovtiń taǵy birneshe eńbegin jınaqtap, ony sıfrlandyrý júıesine engizetin bolamyz», dedi dóńgelek ústeldi ashqan ýnıversıtet rektory Muhtar Tólegen.
Júrsinǵalı Ahmerovtiń jubaıy Sholpan Toǵysova óz sózinde ǵalym bar ǵumyryn bilim salasyna arnap, Zeınolla Samashev syndy bilikti arheologtardyń birneshe býynyn tárbıelep shyǵarǵanyn tilge tıek etti. «Biz otbasyn qurǵan soń men Jambyl atyndaǵy daryndy balalarǵa arnalǵan mektep-ınternatynda jumys istedim. Sol kezde ol maǵan aýyrlyq salmaý úshin balalarǵa ózi qarady. Keıde balalar aýyryp qalsa: «Sholpan, qyzdardy aýrýhanaǵa aparyp kele alasyń ba?» dep jaılap suraıtyn edi. Sonda men: «Internattaǵy balalardy qaıda qaldyramyn, olardyń sabaqtaryn kim oqytady?» deımin ǵoı kúlip. Ol bolsa: «Onda sen jumysyńnan qalma. Bizdiń elimizge bilimdi balalar kerek» dep túsinistik tanytyp, balalardy dárigerge qaratýǵa ózi baratyn edi. Alaıda ol jumystan esh sebepsiz qalyp kórgen emes. Júrsinǵalı tańǵy besten turyp, sabaq berýge tyńǵylyqty daıyndalatyn edi. Osydan-aq onyń jaýapkershiligi joǵary, jany jaısań azamat ekenin baıqaýǵa bolady», deıdi Sholpan Toǵysova.
Shara barysynda Júrsinǵalı Ahmerovtiń eńbekteri jınaqtalǵan kitaptyń tusaýkeseri ótti.
