Is-sharada sóz alǵan qala ákimi Ǵ.Ábdirahymov Elbasy N.Á.Nazarbaevtyń tapsyrmasymen elimizdiń jańa áleýmettik saıasaty iske asyp jatqandyǵyn málimdep, «Áleýmettik qamqorlyq» memlekettik baǵdarlamasy aıasynda kópbalaly otbasylar men halyqtyń az qamtamasyz etilgen toptaryn baspanamen qamtý jumystary júrgizilip jatqanyn atap ótti.
– Memleket turǵyndardy baspanamen qamtý, kópbalaly otbasylarǵa, muqtaj azamattarǵa qoldaý kórsetý baǵyttarynda nátıjeli jumystar júrgizip keledi. Halyqty qoldaýǵa arnalǵan osy jumystardy qýatty memleketter ǵana atqara alady. О́zderińiz jaqsy bilesizder, Shymkent qalasynda sońǵy jyldary qurylys qarqyny artty. Jańa shaǵynaýdandar salynyp, myńdaǵan otbasylar baspanaly boldy. Byltyrdyń ózinde qalamyzda «Nurly jer» memlekettik baǵdarlamasy boıynsha 1152 otbasy baspanaly boldy. Bul dástúr bıyl da jalǵasyn taýyp, talaı otbasy baspanaly bolý baqyty buıyrǵaly tur. Qalanyń damý josparyna osydan 3-4 jyl buryn ǵana engizilgen «Shymkent-Sıtı» zamanaýı qalashyǵy búgin alǵashqy turǵyndaryn qabyldaýda, - dedi qala ákimi.
Aıta ketsek, jyl sońyna deıin 828 páterli 14 arendalyq úı paıdalanýǵa beriledi. Budan basqa «7-20-25» baǵdarlamasy arqyly 246 páterli 5 kredıttik úı berilse, «Turǵyn úı qurylys jınaq banki» arqyly Nursát shaǵyn aýdanynda 656 páterli 11 kredıttik turǵyn úı, «Shymkent» ÁKK arqyly 1016 páterli 24 kredıttik turǵyn úı halyq ıgiligine tapsyrylmaq. Jeke qurylys kompanııalary esebinen 1293 páterli 26 turǵyn úı paıdalanýǵa berilmek.
Al «Shymkent-Sıtı» qalashyǵy taıaý bolashaqta megapolıstiń qarqyndy damý ortalyǵyna aınalady. Qalashyqtaǵy qonys toıy barysynda turǵyndarǵa merekelik dastarhan jaıylyp, is-sharanyń sońy dýmandy konsertke ulasty.
