Esterińizge sala keteıik, álem chempıonaty 10-20 mamyr aralyǵynda Ulybrıtanııanyń Manchester qalasynda ótedi. Atalǵan lısenzııalyq dodaǵa Qazaqstan tolyq qurammen qatysýdy josparlap otyr.
Búginde qazaqstandyq taekvondoshylar Ońtústik Koreıada birlesken oqý-jattyǵý jıyndaryn ótkizýde. Al 73 kelide baq synaıtyn Jansel Denız qurama sportshylarynyń qataryna endi qosylmaq. Buǵan sportshynyń kútpegen jerden jaraqat alyp qalýy sebep bolǵan.
«Germanııadaǵy týrnırden elge oralyp, dereý jattyǵýdy bastap ketkenbiz. Daıyndyq kezinde tizemdi jaraqattap aldym. Sodan beri bir aıdaı emdelip, jattyǵý jıyndarynan syrt qalǵan jaıym bar. Bizdiń komanda on shaqty kúnnen beri Koreıada daıyndalýda. Men olardyń qataryna jaqyn arada qosylamyn. Áli eki-úsh apta boıy emdelýim qajet edi. Biraq ýaqyt tyǵyzdyǵyna baılanysty jolǵa shyǵyp baram. Manchesterdegi álem chempıonatyna jaraqatyma qaramaı qatysamyn dep sheshtim. О́ıtkeni, bul óte mańyzdy týrnır. Onyń ústinde, men eń birinshi jarys kúninde synǵa túsemin. Daıyndyǵym oıdaǵydaı bolmasa da, álem chempıonatynda barymdy salamyn», - deıdi Jansel.
Aıta ketelik, Jansel Denız bıylǵy maýsymdaǵy reıtıngilik týrnırlerdiń barlyǵynda da júldegerler qatarynan kórindi.
