Qazaqstan Prezıdenti komandalyq pýnktke baryp, áskerı tehnıkalar men qarý-jaraq úlgilerin, ınfraqurylymdyq nysandardy, sonyń ishinde modýldi jyljymaly gospıtaldi, mehanıkalandyrylǵan nan zaýytyn, azyq-túlik qoımasyn, pılotsyz ushatyn apparattardy basqarý pýnktin aralap kórdi.
Joǵarǵy Bas qolbasshy áskerılerdi oqý-jattyǵýdy tabysty aıaqtaýymen, sondaı-aq, aldaǵy Otan qorǵaýshylar kúni jáne Jeńis kúni merekelerimen quttyqtap, qyzmetterine tabys tiledi.
– Qarýly Kúshterdiń basty mindeti – Táýelsizdik pen el aýmaǵynyń tutastyǵyn qorǵaý. Memlekettiń senimdi qalqany ári tiregi sanalatyn Qazaqstan armııasy – kúshti ári mobıldi. Búgin sizder táýelsiz Qazaqstannyń Qarýly Kúshteriniń qýatyn kórsettińizder. Áskerı bólimsheler kásibı daǵdylary men jaýyngerlik rýhyn is júzinde dáleldedi, – dedi Qasym-Jomart Toqaev.
Memleket basshysy dalaǵa tigilgen áskerı lagerge baryp, «soldat botqasynan» dám tatty, qatardaǵy sarbazdarmen áńgimelesti.
