Kóshe qıylysynan shyǵa kelip, bizdiń aldymyzǵa túsken «Djıptiń» artqy terezesindegi «Qazaq halqyna + 1 batyr!» degen jazýdy kórip, ezý tarttyq. Uldy bolǵan eken-aý!
Rýldegi jigittiń kóńil kúıi kólikke birden áser etetini anyq. Júıtkip-aq keledi. Baǵdarshamnyń qyzylyna kilt toqtap, jasyly janǵanda silkine jóneledi.
Qazekemniń mundaıda: «Áıeli ul tapqandaı qýanyp!» deıtin ázilin eriksiz eske túsiredi.
Biz otyrǵan mashınanyń rýlindegi jigit basyn shaıqap: «Qýanyshtyń da óz orny, óz jaýapkershiligi bar emes pe, – deıdi álgi júrgizýshiden saqtanyńqyrap kele jatqanyn sezdirip. – Búıte berse, birnársege arandap qalýy ábden múmkin ǵoı».
Árıne, mynaý megapolıstegi kóshe qozǵalysy eshkimniń de erkeligin kótere almaıdy. Ersili-qarsyly aǵylǵan mashınalardyń tizgininde shıyrshyq atyp bir-bir «Júıke» otyrǵanyn esten shyǵarmańyz. Olardyń biriniń shamyna shı júgirtseńiz, júz kólikke kesirińiz tııýi múmkin.
Áıtkenmen, artqy oryndyqta jalǵyz ózi otyrǵan balýan tulǵaly, jomart minezdi dosymyz keńk-keńk kúlip: «Áı, jigitter, bárinen de anaý terezedegi jazýdyń salmaǵy aýyr emes pe?! – dedi gújildep. – Jańa ǵana dúnıege kelgen sábıdi batyr etip tárbıeleýden artyq jaýapkershilik bar ma, sirá?..».
Osydan soń árqaısymyz onyń sózin ózimizshe tarazylap, únsiz qaldyq.
Kim bilsin, biz týǵanda da ákemiz batyr bolady dep qýanǵan shyǵar degen oı ishteı mazalap kele jatty...
