Aqsý qalasynda batyrǵa arnalǵan eskertkish ashyldy.
Mekteptegi Dańq mýzeıinde batyrdyń ómirine, maıdandaǵy jolyna arnalǵan tarıhı qujattar, sýretter saqtalǵan.
Qujattardyń jáne estelik sýretterdi týǵan inisi Shora men kelini Bıǵaısha tapsyrypty. Mýzeıde Qanash atamyzdyń úlken portreti tur.
1941 jyly Almatydaǵy Qazaq pedagogıkalyq ınstıtýtyn támamdaǵany týraly attestaty, stýdenttik shaǵyndaǵy ustazdarymen jáne dostarymen birge túsken fotolary qoıylypty.
Sonymen birge, marqum jýrnalıst Tóleýbek Qońyrdyń «Alysta qalǵan aǵa» atty sarǵaıǵan gazet maqalasy bar. Batyrdyń ákesi Qamza Seksenbaevtyń óz qolymen jasap, balasyna berip ketken eski dombyrasy saqtalǵan.
1942 jyly soǵysqa attanǵan Qanash Qamzın 52-shi atqyshtar dıvızııasynyń 429-shy atqyshtar polkiniń komandıri bolǵan.
Moldavııany azat etýde jáne Dnestr ózeniniń mańynda bolǵan shaıqasta erlik kórsetkeni qujattarda jazylǵan.
1944 jyldyń sáýir aıynda leıtenant Qamzınniń rotasy Dnestr ózenin ótip baryp, Moldavııanyń Tıraspol aýdanyna qarasty Gýra-Vykýlaı derevnıasy mańyndaǵy shaıqasta erlikpen qaza taýyp, sol jerde jerlengen.
1944 jyly qyrkúıek aıynda KSRO Joǵarǵy Keńesi Prezıdıýmynyń ókimimen Keńes Odaǵynyń Batyry ataǵy beriledi.
Al, 1966 jyly Pavlodar oblystyq atqarý komıtetiniń sheshimimen Jolqudyq aýylyna Qanash Qamzın esimi beriledi.
Biraq, keıin Jolqudyq aýylynyń ataýyna qaıta oralady.
Aýyldyq jerlesteri áli kúnge deıin bul «ózgeristiń» sebebin túsine almaıdy.
Qazir Jolqudyqtaǵy Qanash Qamzın atyndaǵy mektepte batyrdyń týǵanyna 100 jyl tolýyna oraı sharalar bastalǵan.
8-shi synyp oqýshysy Mıras Medeý batyr atasy týraly ǵylymı joba jazýda.
Sondaı-aq, 2015 jyly Moldavııanyń Gýra-Vykýlaı derevnıasyna barǵan jerlesteri batyrdyń zıratynan alyp kelgen bir ýys topyraǵy arnaıy ydysta saqtaýly tur.
Gýra-Vykýlaı derevnıasyna 1974 jyly inisi Shora Qamzın,odan keıin Qanash Qamzın atyndaǵy mektep oqýshylary men ustazdary baryp qaıtqan.
Aldyńǵy jyly Aqsý qalalyq ardagerler keńesiniń tóraǵasy Zalmuhan Aryn bastaǵan delegasııa baryp, batyrdyń basyna zııarat jasap keldi.
Jerlesteri marqumnyń arýaǵyna quran baǵyshtap oqytyp, as bergen.
Jolqudyqtan alyp barǵan bir ýys topyraqty batyrdyń beıitine seýip, basyna 10 túp alma aǵashyn otyrǵyzady.
Gýra-Vykýlaı derevnıasynyń bir kóshesine Qanash Qamzınniń aty berilip, mýzeı ashylǵan.
Bıyl Gýra-Vykýlaıda Qanash Qamzınniń eskertkish ashylyp, týystary, jerlesteri arnaıy baryp qatysady dep josparlanýda.
Pavlodar oblysy,
Jolqudyq aýyly
