«Sábıdiń kindigin kesken áıel «kindik sheshe» atanady. Al, sábıdi perzenthanada bosandyryp alyp, odan keıin bir apta ótkennen keıin onyń kútimin jasaýǵa qatysqan áıelderdi de «kindik sheshe etip alatyndar jıi kezdesedi. Men óz qolymmen 18 balany bosandyryp aldym. Sheshesiniń kókiregine basyn qoıyp, sodan keıin ýyzyn embegen bala qytymyr, qatigez bolyp ósedi. Keshegi Keńes dáýirinde perzenthanada bosandyryp, balasyn jýyndyryp –shaıyndyryp baryp, anasyna ákeletin. Ondaı bala anasynyń ıisin birden almaǵan soń, ishegi túıilgenshe jylap, óksigin basa almaı, júregine qan qatady. Balany tabıǵı túrde bosandyryp, anasynyń qasynan aıyrmaý kerek»,-deıdi Aıymjan apa.
Uzaq ómir súrýiniń syryn Aıymjan apa «ishken asy men aqyl oıynyń, boıynyń tazalyǵynda» dep biledi. Jeti jasynan bastap jasyryp namaz oqyp kelse, toqsannan asqan soń, múmkindigi shekteýli bolǵandyqtan sájdege jyǵylmaı, otyryp duǵa oqýyn jalǵastyryp keledi. Jaqyn mańdaǵy eldi mekenderdiń kelin-kepshikteri Aıymjan apany «Táýip kempir» dep tanıdy. Júzge jaqyndaǵan ájemiz búldirshinderdiń tamaǵyn basyp, ishin ýqalap, jel qarysqanyn shyǵaryp, basy aýyrǵandy baılap, teńestirip, duǵa oqyp emdeıdi. Kórshi aýyldardaǵy malyn joǵaltqan tanystary da Aıymjan apaǵa arnaıy kelip qumalaq ashtyryp jatady. «Osy kisi sekildi uzaq jasap, tazalyqqa jany qumar bolsyn!» degen nıetpen balalary men nemereleriniń tusaýyn kestirýshiler kóptep keledi.
«Biz kezinde qoı-eshkini kógendep saýatynbyz. Bıeni segiz mezgil saýdyq. Qoıdyń júninen kilem toqyp, tekemet basatynbyz. Esiktiń aldyndaǵy baý-baqshadaǵy jemis-jıdekterden túrli tosaptar jasaıtynbyz. Kezinde tandyrdyń peshin de jasap, sattym. Qazir sút, jumyrtqa, nan satyp alyp otyrǵan kelinderge janym ashıdy»,-deıdi ájemiz.
Eskendir Ertaı
