Jalpy respýblıkalyq qoǵamdyq shtabqa 190 adam kirgen, onyń 30-y «Team Qazaqstan» jastar qanatynyń múshesi. Jalpy el aýmaǵynda 17 aımaqtyq, 210 qalalyq jáne aýdandyq qoǵamdyq shtab jumys istep, onda 6 myńǵa jýyq adam qyzmet kórsetetin bolady. Kandıdattyń 19 500 senimdi ókili anyqtalǵan.
Qasym-Jomart Toqaevqa saılaýaldy naýqannyń úgit-nasıhat jumystarynyń bastalǵany jóninde jan jaqty aqparat berildi.
QR Prezıdenttigine kandıdat respýblıkalyq jáne aımaqtyq qoǵamdyq shtab basshylarymen jáne múshelerimen keńes ótkizdi.
Jıynnyń ashylýyndaǵy sózinde Qasym-Jomart Toqaev saılaýaldy naýqannyń mańyzdylyǵyna toqtalyp, saılaý - Qazaqstannyń damýyndaǵy jańa kezeńge jol ashatynyn atap ótti.
Saılaýaldy kezeńde shtabtar men partııanyń barlyq uıymdastyrýshylyq áleýetin tıimdi paıdalaný qajettigin aıtyp, birqatar basymdyqtardy anyqtap berdi.
– Bizdiń saılaýaldy baǵdarlamamyz sabaqtastyq, ádildik jáne órleý degen negizgi úsh qaǵıdaǵa taban tireıdi. О́ıtkeni Elbasy saıasatynyń sabaqtastyǵy ǵana elimizdiń qarqyndy damýyn qamtamasyz etedi. Azamattar úshin eń mańyzdysy – ál-aýqattyń artýy. Bizdiń ekonomıkalyq jetistikterimizdi ár qazaqstandyq sezinýi tıis. Bul – ádildiktiń belgisi. Sondyqtan aldymyzǵa naqty maqsattar qoıyp otyrmyz. Oǵan qol jetkizý úshin biz úzdiksiz damyp, únemi órlep, órkendeýimiz kerek, – dedi Qasym-Jomart Toqaev.
Qasym-Jomart Toqaev saılaýaldy naýqan kezeńin jáne saılaýdy ashyq ári ádil ótkizý úshin qoldanystaǵy zańnamalardyń talaptary qatań saqtalýy qajet ekenine basa nazar aýdardy.
– «Nur Otan» partııasy ashyq saılaý ótkizýdi jáne demokratııalyq talaptardyń qatań saqtalýyn qalaıdy. El úshin taza, ashyq, ádil saılaýdyń ótkeni asa mańyzdy, – dedi QR Prezıdenttigine kandıdat.
Keńeste respýblıkalyq qoǵamdyq shtabtyń basshysy, «Nur Otan» partııasy Tóraǵasynyń Birinshi orynbasary Máýlen Áshimbaev Qasym-Jomart Toqaevqa elektoraldy naýqan kezindegi shtabtyń jumysy jaıynda baıandap berdi. Onyń aıtýynsha, elimizdiń barlyq aımaqtarynda 227 qoǵamdyq shtab jumys isteıdi. Ondaǵy barlyq is-sharalar Qazaqstannyń saılaý týraly zańnamalaryna sáıkes, arnaıy júıelik kestelerge jáne elektoraldy naýqannyń medıa-josparyna negizdelgen.
Jıyn barysynda Aqtóbe, Shyǵys Qazaqstan oblystary men Almaty qalasynyń saılaýaldy shtabynyń jetekshileri beınebaılanys arqyly daıyndyqtary týraly baıandady.
Sondaı aq, respýblıkalyq shtab músheleri: «Qarýly Kúshterdiń ardagerleri» RQB Ortalyq keńesiniń tóraǵasy Muhtar Altynbaev, QR Parlamenti Májilisiniń depýtaty Bekbolat Tileýhan, shtabtyń jastar qanatynyń múshesi, kórkem gımnastıkadan álemdik saıystarda top jarǵan belgili sportshy Anna Alıabevalar sóz sóıledi.
Respýblıkalyq qoǵamdyq shtab músheleri 13 mamyrdan bastap elimizdiń barlyq óńirlerin aralap, halyqpen kezdesýler ótkizýdi josparlap otyr. Ol jıyndarda kandıdattyń saılaýaldy baǵdarlamasynyń basty qaǵıdalary men halyq úshin ózekti máseleler talqylanbaq.
