Aıtýly jarysta 73 kılo salmaqta tatamı qojaıyny Hıdaıat Geıdarov bas júldeni oljalady. Bul balýanǵa biz beker toqtalyp otyrǵan joqpyz. 21 jastaǵy óren qazaqtyń qasıetti topyraǵynda, naqtylap aıtsaq, Qaraǵandy qalasynda dúnıege keldi. Keıinnen ata-anasymen birge Qap taýy bókterine qonys aýdardy. Sol jaqta dzıýdo kúresin meńgerip, eleýli tabystarǵa qol jetkizdi. Jasóspirimder men jastar býyny arasyndaǵy jarystarda jasyndaı jarqyrap, eresekter dýyna erkin qosyldy. 2017 jyly Eýropa chempıony jáne Islam yntymaqtastyǵy oıyndarynyń jeńimpazy atandy. 2018 jyly qurlyq birinshiliginde kúmis jáne álem chempıonatynda qola medaldi oljalady. Kóptegen halyqaralyq týrnırlerde top jardy. Mine, endi Bakýdegi jarysta Qazaqstannyń týmasy bas júldeni qanjyǵasyna baılady.
«Grand Slam» dodasynda Hıdaıat Geıdarovtan bólek, ózge salmaq dárejelerinde brazılııalyq Felıpe Kıtadaı (60 kılo), moldovalyq Denıs Vıerý (66 kılo), ızraıldik Sagı Mýkı (81 kılo), serbııalyq Nemanııa Majdov (90 kılo), gollandııalyq Maıkl Korrel (100 kılo) jáne grýzııalyq Gela Zaalıshvılı (+100 kılo) syndy sańlaqtar jeńis tuǵyrynyń eń bıik satylaryna kóterildi.
