Batys Qazaqstan oblystyq orman sharýashylyǵy jáne janýarlar dúnıesi aýmaqtyq ınspeksııasynyń aqparaty boıynsha, 2019 jylǵy 9 mamyrda shamamen saǵat 21.39-da «102-ge» kýágerlerden Nazarbaev dańǵylyndaǵy 196-shy úıdiń 2-shi qabatyndaǵy balkonda «aıýdyń» júrgeni týraly habar kelip túsken. Al, áleýmettik jeli qoldanýshylary qonjyqty sýretke túsirip, taratqan edi.
Polısııa qyzmetkerleri joǵaryda kórsetilgen meken-jaıǵa kelgen soń shaqyrý faktisi rastaldy.
Isti qaraý barysynda anyqtalǵandaı aıýdyń ıesi Aqtaý qalasynyń turǵyny M.I.Talaspaeva (1977 j. t.) bolyp shyqty, ol qonjyqqa tıesili barlyq qajetti qujatty kórsetken.
Osy fakti boıynsha Talaspaevaǵa birqatar suraqtar qoıyldy. Belgili bolǵandaı, ol 2019 jyly 8 mamyrda sırkke úıretý maqsatynda qońyr aıýdyń qonjyǵyn Reseıdiń Ýfa qalasynan satyp alǵan.
Odan keıin olar Oral qalasyna túneýge kelip, Nazarbaev dańǵylyndaǵy 196 úıdi jaldaǵan. Aıýdyń ıesiniń aıtýynsha, keıin olar qonjyqty páterde qaldyryp, azyq-túlik alýǵa shyǵyp ketken.
Osy ýaqytta ol balkonǵa shyǵyp, ótip bara jatqan adamdardy qorqytyp úlgergen.
Alaıda, qylmystyq jáne ákimshilik quqyq buzýshylyq bolmaǵandyqtan bul máselege qatysty eshqandaı sharalar qoldanylmaıtynyn jazdy Sáken Dildahmet.
