Elordanyń qurylys jáne turǵyn úı saıasaty basqarmasynyń málimetinshe, nysandy qyrkúıek aıynda tapsyrý josparlanyp otyr. О́rt sóndirý deposy ǵımaratynyń úı-jaılaryn josparlaý kezekshi aýysym jeke quramynyń dabyly boıynsha kedergisiz qozǵalysty qamtamasyz etedi.
Atap aıtqanda, órt sóndirý bólimshelerin jedel jınaý úshin kezekshi aýysymdardyń demalys orny avtomobıl parkiniń janynda, ıaǵnı birinshi qabatta ornalasady.
Jańa deponyń birinshi qabatyna dıspetcherlik baılanys torabyn, personalǵa arnalǵan bólmeni, kıim men órt jeńderin keptirýge arnalǵan úı-jaıdy, sondaı-aq sheberhanany ornalastyrý josparlanǵan. Akkýmýlıator tambýry bar jeke úı-jaı da qarastyrylǵan.
As ishýge arnalǵan bólme ekinshi qabatta ornalasady. Sondaı-aq, kezekshi aýysymdarǵa arnalǵan kıimder ilinedi. Úshinshi qabatta jeke aımaqqa bólingen 40 oryndyq jataqhana, keńes zaly, psıhologııalyq jeńildeý bólmesi bar sport zaly, oqý synyby, jol qozǵalysy qaýipsizdigi kabıneti, ınspektorlar kabıneti jáne halyqqa nusqaýlyq bólmesi qarastyrylǵan.
Deponyń tórtinshi qabaty qyzmetkerlerge arnalǵan páter retinde paıdalanylmaq. Jertólede qoımalar, gaz tútin qyzmeti beketi, jeldetkish kameralar ornalasady.
Jańa depo ýchaskesinde 50 m3 órt sóndirý rezervýary jáne avtokólik turaǵyna arnalǵan alańy bar órt gıdranty, eki rezervýary bar eki baǵanaǵa AJQS, oqý munarasy bar alań, kedergileri bar 100 metrlik jolaqqa arnalǵan alań, ámbebap alań, sondaı-aq demalýǵa jáne sharýashylyqqa arnalǵan alań ornalasatyn bolady.
О́rt sóndirý deposynyń qurylysyna barlyǵy 91 adam jumyldyryldy.
Qazirgi ýaqytta qalalyq ortany regenerasııalaý basqarmasy úsh órt sóndirý deposyn, onyń ishinde №28 kóshede, «Kóktal» turǵyn alaby men «Úrker» turǵyn alabynda jobalaýdy bastaıdy. Jańa depolardyń qurylysy 2020 jylǵa josparlanǵan.
