Aǵymdaǵy jyly jazǵy demalys 1-10 synyp oqýshylary úshin birneshe baǵyt boıynsha uıymdastyrylady. Balalar Aqmola oblysy aýmaǵyndaǵy «Borovıchok» jáne «Arman» lageri, Ereımentaý aýdany aýmaǵyndaǵy «Batyr» shatyrly lagerinde, sondaı-aq «Tulpar» kıiz úı lagerinde demala alady.
«Sonymen qatar, 77 mekteptiń janynda 1-4 synyp oqýshylaryna arnalǵan mektep janyndaǵy lager jumys isteıtin bolady. 5-6 synyp oqýshylary úshin mektep janyndaǵy «Dıdarly jaz» sporttyq-oıyn alańdary jumys isteıdi. 8-10 synyp oqýshylary «Aıbyndy maýsym» áskerı-patrıottyq baǵyttaǵy baǵdarlamaǵa tartylady», – dep habarlady qalalyq bilim basqarmasynyń baspasóz qyzmetinde.
Sondaı-aq, mektepterde jumyspen qamtýdyń birneshe túri uıymdastyrylady: mektep aýmaǵyn kógaldandyrý jáne abattandyrý brıgadalary, zııatkerlik, shyǵarmashylyq jáne tildik úıirmeler, shyǵarmashylyq konkýrstar. Oqýshylar saraılarynyń janynda «Balalardyń boıtumary» jazǵy demalys akademııasy jáne «Jazǵy shyǵarmashylyq mektebi» uıymdastyrylady.
Vedomstvoda atap ótkendeı, baǵdarlamaǵa júzý elementterine oqytý, lıngvıstıka sabaqtary, alǵashqy shahmat oıynyn úıretý, ınteraktıvti park eksponattarynda jumys isteý daǵdylaryna úıretý, baǵdarlamalaý sabaqtary, beıneleý óneri sabaqtary, teatr stýdııasy jáne t.b. engizilgen.
Sondaı-aq, halyqtyń áleýmettik jaǵynan osal toptarynyń balalary úshin Almaty qalasynda respýblıkalyq jyl boıǵy «Bóbek» lageri jumys isteıdi.
«Ata-anasynyń qamqorlyǵynsyz qalǵan balalar, az qamtylǵan otbasylarynan shyqqan balalar, sondaı-aq, múgedek balalar mektepterdiń ótinimderi boıynsha tegin negizde demalýdyń, saýyqtyrýdyń jáne jumyspen qamtýdyń barlyq túrlerimen qamtamasyz etiledi», – delingen qalalyq bilim basqarmasynyń baspasóz habarlamasynda.
