Atalǵan týrnır Qazaqstanda ekinshi ret uıymdastyrylyp otyr. Byltyr qyrkúıek aıynda jalaýy jelbiregen jarys velosport áleminde CL2 sanatyndaǵy týrnırler qataryna jatatyn. Bıylǵy dodanyń sanaty bir saty joǵary - CL1. Bul synda sportshylar reıtıngilik upaı jınaý úshin jantalasady.
Silk Way Series Astana týrnıriniń ótkizilý formaty bıyl biraz ózgeriske ushyrady. Jarys deńgeıi ósip, Qazaqstan óz tarıhynda tuńǵysh ret CL1 sanatyndaǵy týrnırdi qabyldaýda. Bul týrnırdiń CL2-den basty aıyrmashylyǵy – reıtıngilik upaılar sanynyń kóptiginde. CL1 týrnırinde jeńiske jetken shabandoz birden 200 upaı enshileı alady.
Jarys eki kezeńge bólingen. 15-16 mamyr kúnderi CL2, 17-19 mamyr kúnderi CL1 sanatyndaǵy básekeler uıymdastyrylady.
Qazaqstan atynan synǵa túsetin sportshylar quramy: Bogdan Rýder, Andreı Chýgaı, Vıktor Golov, Pavel Vorjev, Artem Zaharov, Dmıtrıı Rezanov, Maksım Naletov, Andreı Kreıs, Aleksandr Safarov, Temirhan Sııazbekov, Ǵabıden Ázen, Álisher Jumaqan, Roman Vasılenkov, Sultanmurat Mirálıev, Nıkıta Panasenko, Iogan Shteın, Robert Gaıneev, Igor Iýsıfov, Nastasııa Shapovalova, Rınata Sýltanova, Tatıana Bogdanova, Alena Abramchýk jáne Janerke Sanaqbaeva.
Jarysqa Ulybrıtanııa, Qytaı, Gonkong, Reseı, Ázirbaıjan, О́zbekstan, Ýkraına, Gollandııa, Ispanııa, Lıtva jáne Qazaqstannan 70 sportshy qatysýda. Olardyń arasynda alty dúrkin Olımpıada chempıony, ulybrıtanııalyq Djeıson Kennı de bar.
Búgin «skretch» boıynsha áıelder arasyndaǵy fınaldyq syn aıaqtaldy. Jalpy esebi 12 sportshy qatysqan synda júldeniń barlyǵyn Qytaı qyzdary jınap aldy. Qazaqstandyq Rınata Sýltanova medalǵa qol sozym jerden toqtap, tórtinshi oryn ıelendi.
