Qoly qysqa kóp balaly otbasylar úshin baspanasyn jóndeý ońaı sharýa emes. Kórpesine qaraı kósilýdi jón sanaıtyn osy otbasylardy qýantý maqsatynda júzege asqaly otyrǵan jobaǵa memleketten 130 mln teńge qarjy bólingen. Buǵan «31 arnanyń» da qosar úlesi bar.
«Áleýmettik az qamtylǵan otbasylardy demeý – eldegi basty baǵyttardyń biri. Máselen, jyl saıyn kóp balaly otbasylardy qoldaý maqsatynda kóptegen memlekettik baǵdarlamalar júzege asyrylady. Bıyl ataýly áleýmettik kómekpen qatar, 40 myń jaldamaly páter qurylysyna qatysty jańa is-sharalar qolǵa alyndy. Aqparat jáne qoǵamdyq damý mınıstrligi de kóp balaly otbasylarǵa baılanysty bastamalardy qoldaýǵa árdaıym daıyn. Jańa joba aıasynda kóp balaly otbasylardyń páterleri men úıleri tolyq jańartylady. Jobada barlyq óńir qamtylady. Logıstıka sııaqty qıyndyqtarǵa qaramaımyz. Eń basty maqsatymyz – muqtaj otbasylarǵa kómektesý. Baspanany jóndeý kezinde páter jaldanyp, otbasy sonda ýaqytsha turady. Televızııalyq joba bolǵan soń uzaq túsirilýi múmkin. Joba basynda úı qandaı boldy, sońynda qandaı bolady degen suraq kórermenge qyzyq bolýy tıis», dedi Aqparat jáne qoǵamdyq damý mınıstri Dáýren Abaev.
Jobaǵa kólemi 55 sharshy metr shamasyndaǵy jeke turǵyn úıleri bar kóp balaly otbasylar ǵana qatysa alady. Bul úshin saýalnama paraǵyn toltyryp, turǵyn úıdiń fotosýretterin usyný qajet. О́tinishter 15 mamyrdan bastap dom@31.kz elektrondy poshtasy arqyly qabyldanady. «31 arnanyń» komıssııa músheleri ótinish bildirgen otbasylardyń áleýmettik jaǵdaıymen tanysyp, tolyq maǵlumat alǵan soń ǵana kómek kórsetýge sheshim shyǵarady. Telebaǵdarlama 11 tamyzdan bastap kórermenge jol tartpaq.
«Kóp balaly otbasynyń kúndelikti turmysynda ózekti máseleler jeterlik. Olardyń kóbi baspana máselesine qatysty. Bul joba olardyń úılerindegi ıntererdi jańartyp qana qoımaı, shańyraqtaryna shattyq syılaıdy dep senemiz. Árbir serııa – jeke shyǵarylym, onda bútin bir otbasynyń jeke tarıhy qamtylady. Jyl sońyna deıin jobaǵa 24 otbasy qatysady. Qaıyrymdy baǵdarlamanyń jalǵasatynyna senemin», dedi «31 arnanyń» bas dırektory Iýrıı Brodskıı.
Maıgúl SULTAN,
«Egemen Qazaqstan»
