«Men Qazaqstanǵa sengen jáne búgingi kúni de senim artyp otyrǵan seriktesterimizdiń, memleketterdiń, dostas ınvestorlardyń senimin joǵary baǵalaımyn. Mundaı pragmatıkalyq optımızmdi Qazaqstannyń saıası jáne ekonomıkalyq júıesine senimdiliktiń mańyzdy kórsetkishi sanaımyn. Bizdiń elimiz álemdik qoǵamdastyqtyń qurmetti múshesine aınaldy. Táýelsizdik jyldarynda ekonomıka 20 ese artyp, kedeıshilik 40-tan 3 paıyzǵa deıin qysqardy. Biz bul baǵytty nyǵaıtýdy jalǵastyramyz», dedi Nursultan Nazarbaev.
N.Nazarbaev elimizdiń Syrtqy ister mınıstrligi shetel ınvestısııasyn tartý máselesinde negizgi organ ekenin, al sheteldegi Elshilikter Qazaqstanda jumys isteýge nıet tanytqan kez kelgen ınvestor úshin biryńǵaı terezege aınalatynyn aıtty.
«Biz álemdegi eń damyǵan 30 eldiń qataryna kirý jumystaryn jalǵastyra beremiz. 2050 jylǵa deıin damý strategııasy qabyldanǵan. Bizdiń barlyq strategııamyz ben baǵdarlamamyz bir maqsatqa jumyldyrylǵan. Búkil Qazaqstan osy baǵytta jumys isteýde», dedi Elbasy.
