Baspanaly bolyp, qýanyshqa kenelgen Kúlzıra Abdýllaeva Baıqadam aýyldyq okrýginde turady. О́zderiniń jeke úıleri bolmaǵandyqtan, olar uzaq jyldar boıy jaldamaly páterde turyp kelgen. Búginde baspanaly bolǵan otbasy turǵyn úı máselesin sheship bergen kásipker Toqtasyn Bilálıevke alǵys aıtty. «Osy bir qýanyshty sátti biz uzaq jyl kúttik. Endi mine qamqor jandardyń arqasynda bizdiń óz úıimiz bar. Toqtasyn Bilálıev jerlesim, ózi de kóp balaly otbasynda ósken azamat. Kómegi men qamqorlyǵy úshin ol kisige alǵys bildiremin. Jer aýmaǵy keń, jemis taldary mol úıge qol jetkizgenime sene alar emespin. Endi úıime baý-baqsha egip, balalarymnyń ıgiligine jaratamyn», deıdi bes balanyń anasy Kúlzıra Abdýllaeva. Al, óz kezeginde Toqtasyn Bilálıev kásipkerlerdi muqtaj jandarǵa árdaıym qol ushyn sozýǵa shaqyrdy. «Osyndaı qaıyrymdy isten eshkim tys qalmaýy kerek. Bizder, kásipkerler muqtaj jandarǵa qoldan kelgen kómegimizdi aıamaǵanymyz jón. Bıznes ókilderi bul bastamaǵa qoldaý kórsetip, az qamtylǵan otbasylarǵa kómek kórsetedi dep senemin», deıdi kásipker.
Sonymen qatar, Sarysý aýdanynyń ortalyǵy Jańatas qalasynda Qazaqstannyń Qurmetti qurylysshysy, «Altyn Orda – 2006» JShS basshysy Dáýletaldy Janbaev jeti balanyń anasy Gúlsana Qalıevaǵa úsh bólmeli páter kiltin tabystady. «Árdaıym óz úıimiz bolsa dep armandaýshy edik. Bizge kómektesken azamattarǵa alǵys aıtamyn. Jeti birdeı balam bar. Onyń biri múgedek. Balalardy jalǵyz ózim qalaı asyrap, jetildirip, qashan páter alamyn dep ýaıymdaýshy edim. Qasıetti aıda tosynnan kelgen syı otbasymyzdy qýantty. Bizderdiń jaǵdaıymyzdy oılaǵan oblys ákimi Asqar Myrzahmetovke, sonymen qatar kásipker azamattarǵa alǵys aıtamyn», deıdi Gúlsana Qalıeva. Sonymen qatar, kópbalaly ana kásipker Dáýletaldy Janbaevqa alǵysyn bildirdi.
Jańatas qalasynda ornalasqan páter jaryq ári taza. Barlyq bólmesi zamanaýı jóndeýden ótken. Al, kópbalaly anaǵa baspana alyp bergen kásipker Dáýletaldy Janbaev jaqsylyq jasaýdy óziniń azamattyq paryzy dep biletinin aıtty. «Balalardyń búgingi qýanyshty júzderine qarap turyp, ózim de qýandym. Bul páter Gúlsana qaryndasymyzdyń ıgiligine jarasyn. Balalary úlken azamat bolyp, el tiregine aınalsyn», dedi kásipker.
Jambyl oblysy
