Taǵy bir mysal. «Búgin qurbymnyń úıine baryp keldim. Qınalyp júr eken. Ata-enesimen birge turady, olar kári kisiler de emes, alaıda jasap bergen shaıdy ózderi quıyp ishpeı, kúnine neshe ret dastarqan jaıylsa sonyń basynda otyryp, shaı quıýyn qalaıdy eken», dep jas qyz áńgimesimen bólisti. «Qyzym, men saǵan bir áńgime aıtyp bereıinshi, – dep taǵy da bir áje áńgimesin bastaǵan.
– Árbir úıde «Joq» atty kip-kishkentaı qap-qara birdeńe bolady eken. Sol kishkentaı qaranyń bar azyǵy «joq» degen bir aýyz ún. Álgi úıde «joq» degen sóz aıtylǵan saıyn ol qýanyp, ornynan sekirip túsip, birde boıy, birde kóldeneńi ósip, sol úıde barǵa, bereketke oryn qaldyrmaı, bárin joqpen toltyryp tastaıdy eken. Al ol joqtyń da qorqatyny bar kórinedi. Ol ne deısiń ǵoı. Sol úıde kúndelikti dastarqan jaıylǵanda onyń ústinde qanatyn jaıyp, aıtylǵan jaqsy sóz, bata-tilekterdi qoryp, árbir jaqsy sózge áýmın dep qanatyn qaǵyp turatyn perishteden qorqady eken. О́ıtkeni perishte qanatyn jelpigen saıyn, jaqsy sóz, bereke kókke qaraı toqtaýsyz ótip, Jaratqan dastarqan basyndaǵy ulaǵatty áńgimeni ony qaıyrǵandaǵy bata-tilekti qabyl etip, jańaǵy joqtyń toby kishireıip, ólimsirep qalatyn kórinedi. Sondyqtan dastarqan basyna otbasy músheleri túgel otyryp, tilekter toǵysyp, bata jasalyp, dastarqan jıylýynyń óz taǵylymy, óz mádenıeti bar. Eger dastarqannyń ýaqytynda batasy jasalmaı, ústi jıylmasa perishteniń qanaty talyp álsireıdi, joq kúsh alyp, shańyraqtyń berekesi azaıady degen dástúrde qazaqy uǵym bar. Al seniń qurbyń ulttyq dástúrden aýlaǵyraq ósken, orys mektebinde oqyǵan jan bolsa, osy áńgimeni aıtyp ber. Máselen, men úshin de, eger jaıylǵan dastarqan basyna otbasymnyń músheleri tegis jıylyp, berekeni uıytar áńgime aıtylyp, Alladan tilek tilep, dastarqan qaıyrylmasa kóńilime alań kirer edi. Qurbyńnyń ata-enesi de eger sondaı tárbıeni qanyna sińirip ósken adamdar bolsa, jasap berdim ǵoı, enem atama ózi shaıyn quıyp bere beredi ǵoı, dep jatyn bólmege kirip ketip, óz isimen bolý sol úıdiń dástúrin baltalaý, uǵymyn tamyrynan qıǵanmen teń.
Ár otbasyna kelin kelgende sol shańyraqty óz tártibimmen, tanymymmen júrgizemin dep kelmeıdi. Kelin degen sózdiń ózinde kelip engen degen uǵym jatyr. Árıne kelinmen birge ol úıdiń turmysyna, dastarqan jaıý mádenıetine de qandaı bir jańalyqtar enedi, biraq túbirimen ózgertemin deý qate pikir. Sondyqtan «qyzym saǵan aıtam, kelinim, sen tyńda» degendeı bul seniń ózińe de sabaq bolsyn», dedi ulaǵatty sóz qozǵaǵan áje.
