Ulttyq kınony qoldaý memlekettik ortalyǵy jumysyn bastady. Bul týraly Mádenıet jáne sport mınıstri Arystanbek Muhamedıuly óz Facebook paraqshasynda jazdy.
- Jaqynda Almatyda Qazaqfilm stýdııasynda Memlekettik ortalyq janynan qurylǵan Eksperttik keńesiniń birinshi májilisin ótkizdik. Atalǵan uıymnyń kollegııalyq sheshimi negizinde memlekettik qarjy alýǵa iriktelgen kınotýyndylarǵa memlekettik qarjylaı qoldaý kórsetiletin bolady, - dep jazdy Arystanbek Muhamedıuly.
Qazaqstan Táýelsizdik alǵaly osy salada qabyldanǵan alǵashqy zańnamalyq qujat - QR «Kınematografııa týraly» Zańǵa sáıkes Ulttyq kınony qoldaý memlekettik ortalyǵy quryldy. Bul uıymnyń qyzmetiniń negizgi baǵyty ulttyq kınony qoldaý, ony halyqaralyq deńgeıge kóterý jáne álemdik naryqqa shyǵarý, Qazaqstan kınoóndirisine ınvestısııa tartý. Atalǵan Memlekettik ortalyq arqyly ulttyq fılmderge, ulttyq fılm ataǵyn ıelenýge nıetti kınojobalarǵa memleket tarapynan qarjylaı qoldaý kórsetilip, sonymen qatar kınematografııa salasynda sýbsıdııalar berý iske asady.
Áleýmettik jelidegi jazbasynda mınıstr Memlekettik ortalyqtyń qurylymynda joǵary bilikti top-menedjerler jáne eńbegi sińgen kınematografıstermen qatar kreatıvti jas mamandar bar dep jazady.
- Ortalyqqa jetekshilik etýdi fılosofııa ǵylymynyń doktory, Qazaqstannyń eńbek sińirgen qaıratkeri, QR 2050 jylǵa deıingi mádenı saıasatynyń Tuǵyrnamasynyń jáne QR «Kınematografııa týraly» Zańynyń avtorlarynyń biri Andreı Hazbýlatovqa tapsyrylǵan. Maıtalman rejıssıor Satybaldy Narymbetov Ulttyq kınony qoldaý memlekettik ortalyǵy keńesshisi qyzmetin atqaratyn bolady. Kıno salasynda 50 jyldan asa qyzmet etken Oljabaı Musabekov tóraǵa orynbasary retinde ulttyq kınonyń damýyna óz úlesin qosady. Tımýr Bekmambetovtyń Bazelevs kompanııasynda eńbek etetin, «Profaıl», «Izdeý» fılmderiniń prodıýseri Igor Saı ekinshi orynbasar retinde kommersııalyq jobalar salasyna jańa lep ákeledi, - dep tolyqtyrdy mınıstr.
Sonymen qatar, Memlekettik ortalyqqa álemdik kınokompanııalarda jumys tájirıbesi bar shtattan tys keńesshiler tartylǵan. Memlekettik ortalyq janyndaǵy konsýltatıvtik-keńesshi organ – Eksperttik keńes quramy da tolyq. 2019 jylǵy 15 naýryz kúni qabyldanǵan QR Úkimeti qaýlysyna sáıkes, onyń quramyna qazaqstandyq kınonyń ataqty qaıratkerleri, maıtalman sheberleri enip otyr. Atap aıtar bolsaq: akter, rejısser, Qazaqstannyń Eńbek Eri Asanáli Áshimov, kórkem jáne anımasııalyq kıno rejıssıori Adaı Ábildınov, «Meloman» kompanııasynyń bas dırektory Vadım Golenko, aktıor jáne kınorejıssıor Doshan Joljaqsynov, Sh.Aımanov atyndaǵy «Qazaqfılm» AQ birinshi vıse-prezıdenti Serik Jubandyqov, ssenarııshi, rejıssıor, operator Ahat Ibraev, rejıssıor, ssenarııshi Alekseı Kamenskıı, rejısser, aqyn, Sh.Aımanov atyndaǵy «Qazaqfılm» AQ prezıdenti Baqyt Qaıyrbekov, aktrısa, Qazaqstan kınemtografıster odaǵynyń múshesi Janna Qýanysheva, teatr rejıssıori, Júrgenov atyndaǵy Qazaq Ulttyq óner akademııasy rektory Ashat Maemırov, rejısser, kınodramatýrg Satybaldy Narymbetov, kıno jáne teatr aktrısasy Merýert О́tekeshova, ssenarııshi, ónertanýshy Bekbolat Shekerov, Arman Cinema kınoteatrlar jelisi bas dırektory Baýyrjan Shúkenov. Eksperttik keńestiń birinshi májilisinde daýys berý nátıjesinde Asanáli Áshimov tóraǵa, onyń orynbasary - teatr rejıssıori jáne pedagog Ashat Maemırov saılandy.
Mınıstr ortalyqqa úlken úmit arta otyryp, kıno qaıratkerleri jýyq ýaqytta «Kınematografııa týraly» Zańnyń jaǵymdy tustaryn, sonyń ishinde ekonomıkalyq preferensııalar turǵysynan ońtaıly baǵa beretinine senim bildirdi.
- Zańǵa sáıkes, qazaqstandyq fılmder korporatıvtik tabys salyǵynan kiristiń 20% kóleminde bosatylady - bul kıno kórsetýshiler úshin jaǵymdy jaǵdaı, olar prokatqa bizdiń fılmderdi jiberýge múddeli bolady. Sonymen qatar, ulttyq kınony 12% qosylǵan qun salyǵynan bosatýdy qarastyrdyq. Investısııa tartý úshin biz 30% rıbeıt engizdik - bul álem kınokompanııalary úshin óte mańyzdy, olar óz jobalaryn 45% deıin rıbeıt qamtamasyz etetin elderde júzege asyrady. «Kınematografııa týraly» zańnyń qabyldanýy jáne Ulttyq kınony qoldaý memlekettik ortalyǵy qyzmetiniń bastalýy otandyq qazaq kınosynyń damýy men qalyptasýynyń jańa tarıhynyń basy bolmaq, - dep qorytyndylady Arystanbek Muhamedıuly.
