«Balalardyń demalysyn uıymdastyrý – mańyzdy másele. Ol ár otbasyǵa qatysty», — dedi Úkimet basshysy Asqar Mamın.
Qaraǵandy, Almaty, Pavlodar oblystarynda balalardy demalyspen jáne ispen shuǵyldanýmen tolyqtaı derlik qamtý kózdelgen. Úkimet basshysy qalǵan óńirlerge jaz mezgilinde balalardyń demalysy men bos ýaqytyn tıisti deńgeıde uıymdastyrý sharalaryn dereý qabyldaýdy tapsyrdy.
«Balalar kanıkýl kezinde mýzeılerge, teatrlarǵa, qoryqtarǵa, ulttyq parkterge, sport nysandaryna tegin kire alýy qajet. Taqyryptyq kezdesýler, is-sharalar, saparlar uıymdastyrý kerek», — dedi A. Mamın. — Jazǵy bos ýaqytty uıymdastyrý úshin mesenattardy belsendirek tartý qajet, óńirlerde jaǵymdy mysaldar bar».
Premer-Mınıstr jazǵy demalys sharalaryn uıymdastyrý aıasynda balalardyń qaýipsizdigin qamtamasyz etýdiń mańyzdylyǵyna toqtalyp ótip, ishki ister, bilim berý, densaýlyq saqtaý organdaryna, óńirlerdiń ákimdikterine tıisti qyzmetterdiń jumysyn jumyldyrýdy tapsyrdy.
Balalardyń densaýlyǵyn nyǵaıtý jáne qorǵaý, salaýatty ómir saltyn qalyptastyrý maqsatynda qoǵamdyq oryndardaǵy tamaqtaný sapasyna, tamaqtaný oryndary men bos ýaqytty ótkizý oryndarynda sanıtarlyq tazalyqqa erekshe kóńil bólý qajet.
«Barlyq lagerler medısına qyzmetkerlerimen jáne tıisti pedagogıkalyq kadrlarmen qamtamasyz etilýi tıis», — dedi Asqar Mamın.
Máseleni qaraý qorytyndysy boıynsha Bilim jáne ǵylym mınıstrliginiń kelesi jyly lagerlerdiń sanyn arttyrý boıynsha usynystaryna qoldaý bildirildi.
«Sanatorııler men týrıstik bazalar, ulttyq saıabaqtar jáne joǵary oqý oryndary janynda bir myńǵa deıin jazǵy saýyqtyrý ortalyqtaryn ashý, jumys istemeı turǵandaryn ońaltý boıynsha jumystardy júrgizý qajet. Bul balalardy jazǵy demalyspen tolyq qamtýǵa múmkindik beredi», — dedi A. Mamın jáne óńirlerdiń ákimdikterine balalardyń demalysyn erekshe baqylaýǵa alyp, balalardy demalyspen jáne ispen shuǵyldanýmen barynsha qamtýdy qamtamasyz etýdi tapsyrdy.
