Atap aıtqanda, «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý jáne mıkroqarjylyq qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda depýtattar tarapynan qoldaý tapty. Zań jobasynyń negizgi maqsaty - qarjy naryǵyn retteý, baqylaý jáne qadaǵalaý fýnksııalaryn bólý, tutynýshylyq kredıtteý táýekelderin shekteý boıynsha tujyrymdamalyq tásilderdi ázirleý.
Qujattyń normalary qarjy naryǵyn retteý men damytý, qarjy uıymdaryn baqylaý men qadaǵalaý jónindegi fýnksııalar men ókilettikterdi Qazaqstan Respýblıkasynyń Ulttyq Bankinen jeke memlekettik organǵa berýdi zańnamalyq turǵydan bekitýge, sondaı-aq mıkroqarjylyq qyzmet salasyndaǵy qoǵamdyq qatynastardy retteýge baǵyttalǵan.
Zań jobasyn iske asyrý respýblıkalyq bıýdjetten jyl saıyn qarjy sektoryn retteýdiń táýelsiz organyn ustap turýǵa shamamen 10 mlrd teńge mólsherinde shyǵys shyǵarýǵa ákep soǵady. Osy zańnamalyq qujat boıynsha Májilis Tóraǵasy N. Nyǵmatýlın:
- Búgin elimizdiń áleýmettik-ekonomıkalyq baǵytyn kúsheıtý úshin taǵy bir naqty qadam jasalyndy. Sebebi, osy zań jobasy arqyly elimizde qarjy naryǵyn retteıtin jańa memlekettik organ qurylatyn bolady. Ol barlyq qarjylyq qyzmetterdi tıimdi júzege asyrýǵa jol ashady, - dedi.
Sonymen birge, N. Nyǵmatýlın nesıe alatyn, basqa da qyzmetterdi paıdalanatyn azamattardyń quqyǵyn qorǵaýdy qamtamasyz etetin óte mańyzdy zań jobasyn ekinshi oqylymǵa deıin jan-jaqty pysyqtaý qajettigin aıtty.
Osy kúni depýttattar «Qazaqstan Respýblıkasynyń atqarýshylyq is júrgizý máseleleri boıynsha keıbir zańnamalyq aktilerine ózgertýler men tolyqtyrýlar engizý týraly» zań jobasyn birinshi oqylymda maquldady.
Zań jobasy atqarýshylyq is júrgizý salasyndaǵy zańnamany jetildirýge jáne atqarýshylyq qujattardy májbúrlep oryndatý salasynda qalyptasyp otyrǵan qoǵamdyq qatynastardy retteýge baǵyttalǵan.
Sondaı-aq, osy zań jobasyn qabyldaý arqyly jeke sot oryndaýshylarynyń qyzmetin jetildirý jáne atqarýshylyq is júrgizýdiń tıimdiligin, atap aıtqanda sot oryndaýshysy qabyldaıtyn prosestik qujattardy, áreketterdi ońtaılandyrý arqyly arttyrý jáne osy áreketterdiń dáıektiligin aıqyndaý; zamanaýı tehnologııalardy engizý, atqarýshylyq is júrgizý taraptary úshin májbúrlep oryndatý júıesiniń ashyqtyǵy men qoljetimdiligin arttyrý; jeke sot oryndaýshylarynyń tártiptik praktıkasyn jetildirý; «Astana» halyqaralyq qarjy ortalyǵynyń» sot aktilerin atqarýshylyq qujattar tizbesine engizý; memlekettik eńbek ınspektorlary jumys berýshilerdiń jalaqy tólemeý máseleleri boıynsha bergen uıǵarymdardyń tıimdi oryndalýyn qamtamasyz etý sııaqty mindetterdi sheshýge múmkindik beredi.
Jalpy otyrys sońynda halyq qalaýlylary birneshe depýtattyq saýaldar joldady. Olar E. Bekturǵanov, J. Nurmanbetova, A. Perýashev.
