Aımaqtar • 23 Mamyr, 2019

Alakól demalýshylardy qarsy alýǵa daıyn ba?

919 ret kórsetildi

Jaz týsa, kóp jurttyń sýy shıpaly, aıdyndy Alakólge qaraı alyp ushatyny belgili. Iá, birer aıdyń kóleminde kól jaǵasynda qyzý tirshilik, qarbalas shaq bastalady.

Sońǵy jyldary mun­da­ǵy ınfraqurylymnyń jet­ki­liksiz­digine, joldyń nashar­ly­ǵyna qaramastan Alakólge kelý­­shi­ler­diń qatary kóbeıe túskeni málim. Kóldiń Shyǵys Qazaqstandaǵy bóligin abat­tan­dy­rýǵa keıingi úsh-tórt jyl kóleminde oblys ákimdigi tarapynan qomaqty qarjy bólindi.

El Prezıdenti Qasym-Jomart Toqaev jaqynda Shyǵys Qazaq­stan jáne Almaty oblystaryna jasa­ǵan jumys sapary barysynda Alakóldiń respýblıkadaǵy 10 negizgi týrıstik ortalyqtyń qataryna engenimen, týrısterge sapasyz qyzmet kórsetilip otyrǵanyn atap ótip: «Osyǵan baı­lanysty eki oblystyń ákim­derine jergilikti joldardy jón­deý, qyzmet kórsetý sapa­synyń deńgeıin kóterý máse­le­le­rin tez arada sheshýdi tapsyramyn»,  dep naqty tapsyrma júktegen edi.

Jýyq­ta oblys ákimdiginde aımaq basshysy Danıal Ah­me­tov­tiń qa­tysýymen ótken jıyn­da Alakóldiń jaǵasyndaǵy qyz­met­­­terdiń sapasyn jaqsartý máse­le­le­ri jan-jaqty talqy­lan­dy.

Poıyz 1 maýsymnan júre bastaıdy

Alakólge barǵysy keletin jurttyń kóńilin alańdatatyn áýelgi másele – jol. Oblystyq týrızm basqarmasynyń basshysy Marat Qabaqovtyń aıtýynsha, qazirgi ýaqytta «Taskesken-Baqty» baǵytyndaǵy joldyń 0-20, «Almaty-О́skemen» baǵy­tyn­daǵy joldyń 615-967, 971-1017 shaqyrymdarynda jóndeý ju­mys­tary júrgizilip jatyr. «Bıyl jaǵalaýǵa deıingi avto­kólik jolynyń jóndeý ju­mystary aıaqtalýy tıis. 2019 jyly temir jol jáne áýe reıs­te­rine 122 mıllıon teńge­niń sýbsıdııasyn bólý qaras­ty­rylǵan. Qazir «Almaty – Úrjar», «Nur-Sultan – Úrjar» jáne «О́skemen – Semeı – Úrjar» baǵyttaryna ushaqpen qatynaýǵa bolady. О́skemen men Semeıden Jalańashkól stansasyna deıin júretin poıyzdar 1 maýsymnan bastap qaıta jolǵa shyǵa­tyn bolady. Poıyz eki qaladan da taq kúnderi attanyp, jup kúnderi keri qaıtyp otyrady. Iаǵnı, qalalardan 1 maýsymda, al Alakóldegi «Dostyq» stansasynan 2 maýsymda júredi. Poıyz jaz bitkenshe, ıaǵnı tamyzdyń sońyna deıin júrip turady. Jol júrý ýaqyty – 17-18 saǵat», deıdi basqarma basshysy.

Jıynda oblys ákimi 18 saǵat­tyń demalýshylar úshin tym uzaq ekendigin aıtyp, Jolaýshy kóligi jáne avtomobıl joldary basqarmasyna kesteni qaıta qaras­tyryp, jolǵa ketetin ýa­qyt­ty qysqartýdy tapsyrdy.

Oblystyq týrızm basqarmasy ókiliniń sózine sensek, aldaǵy tórt jylda Alakóldiń jaǵalaýynda sý, káriz qubyrlary salynyp, elektr jelileri tartylyp, emdik qasıeti bar rodondyq sýǵa arnal­ǵan arnaıy qubyr tóseledi. Eń mańyzdysy, sý shaıýynyń aldyn alý úshin Alakóldiń jaǵasyn bekitý jumystary odan ári jalǵa­sady, jolaýshylar aǵynyn art­tyrý maqsatynda Úrjar aýy­lyn­daǵy áýejaıdyń ushý-qoný alańy jańartylady.

Alakóldi abattandyrý ba­ǵy­tyn­daǵy jumystar da aýqym­dy. Bıyl demalys saıabaǵy keń­eı­ti­lip, jaıaý júrginshilerge jáne velosıpedshilerge arnalǵan jol­dar salynyp, taksı turaǵy jón­delmek. Týrısterdiń qaýip­siz­digin qamtamasyz etý úshin aǵymdaǵy jyly polıseılerdiń sany eki esege kóbeıip, qosymsha 60 baqylaý kamerasy ornatylmaq (qazir istep turǵany – 80). Sony­men qatar qaıyqtarǵa arnaıy turaq jasalyp, jaǵalaýǵa kólik ınspeksııasy qadaǵalaý júr­giz­bek.

 

Qyzmet sapasyn jaqsartý qajet

Ákim­dikte ótken jıynda oblys­tyq týrızm basqarmasynyń basshysy aldaǵy jyly «Barlyq-Arasan» – Alakól kóli» oblys­tyq mańyzdaǵy avtojolyna orta­sha jóndeý jumystary júrgi­zi­le­tindigin aıtqanda aımaq bas­shysy «Barlyq-Arasan» shıpajaıynyń jumysyna qa­tys­ty narazylyǵyn bildirdi. «Alakólge kelýshi týrısterdiń sany jyl sanap artyp keledi. Álbette, buǵan biz qýanyshtymyz. Biraq joldardy jóndep, qal­pyna keltirý ǵana azdyq etedi, jaǵalaýda usynylatyn qyz­met­terdiń sapasy joǵary bol­ýy shart. Máselen, «Barlyq-Arasan» shıpajaıy jekemenshik kom­panııanyń ıeliginde, olar dema­lys ornynyń damýyna eshqan­daı qarjy quıyp otyrǵan joq. Shıpajaıdyń tazalyǵyn jeke­men­shik kompanııa tekseredi. Onyń minsiz ekenine eshkim kepil­dik bermeıdi. Emdelýge barǵandar aýyryp qaıtpasyn desek, ol jaqty baqylaýda ustaǵanymyz jón. Ol jerdegi 1917 jylǵy sarǵaıyp ketken vannany da bile­min» degen Danıal Ahmetov Sanıtarlyq-epıdemıologııalyq qyzmet pen Densaýlyq saqtaý basqarmasyna nysanǵa baqylaý júrgizýdi tapsyrdy.

Jıynda bıyl Alakól jaǵa­synda 8 demalys bazasy iske qosylatyny, sondaı-aq «Ker­ýen Plaza» týrıstik kesheni, «Chaı­ka» saýyqtyrý kesheni jáne «Kúnshyǵys Alakól» mádenı-kóńil kóterý kesheni qurylystarynyń bastalǵany týraly da aıtyldy.

 

Shyǵys Qazaqstan oblysy

 

Sońǵy jańalyqtar

15169 adam koronavırýs juqtyrdy

Koronavırýs • Keshe

Uqsas jańalyqtar