Memlekettik tildi bilý – azamattyq paryzymyz – deıdi nemis qyzy Lıza Gotman
Senbi, 19 qańtar 2013 7:33
Semeı pedagogıka ınstıtýty tárbıe bóliminiń mamany Lıza Arnoldovna Gotman burynǵy Abyraly aýdanynyń Qaınar aýylynda 1975 jyly dúnıege kelgen. Ulty – nemis. Biraq, qazaqshaǵa sýdaı. О́ziniń aıtýynsha, jastaıynan qazaq aýylynda ósip, qazaq mektebinde bilim alýy onyń osy tilge degen qurmetin bala kúninen boıyna sińirýge áser etken kórinedi.
Senbi, 19 qańtar 2013 7:33
Semeı pedagogıka ınstıtýty tárbıe bóliminiń mamany Lıza Arnoldovna Gotman burynǵy Abyraly aýdanynyń Qaınar aýylynda 1975 jyly dúnıege kelgen. Ulty – nemis. Biraq, qazaqshaǵa sýdaı. О́ziniń aıtýynsha, jastaıynan qazaq aýylynda ósip, qazaq mektebinde bilim alýy onyń osy tilge degen qurmetin bala kúninen boıyna sińirýge áser etken kórinedi.
Qazaqtyqtyń qaımaǵy buzylmaǵan Abyraly óńiri – Tóleýjan syndy talaı aqyndar men án atasy Ámire, bulbul kómeı Bıbigúldi dúnıege ákelgen kıeli jer. Osyndaı qut daryǵan mekende dúnıege kelip, qazaq degen keńqoltyq ulttyń qasynda ómir súrgen jannyń qazaq tilinde sóılemeýi múmkin de emes tárizdi. 1992 jyly Qaınar aýylyndaǵy S.Begalın atyndaǵy orta mektepti Altyn belgimen bitirgen L.Gotman joǵary bilim alý maqsatymen Semeıdiń sol kezdegi sút jáne et ónerkásibi tehnologııasynyń ınstıtýtyna oqýǵa túsedi.
1997 jyly atalǵan oqý ornyn oıdaǵydaı aıaqtaǵan jas maman ózi támamdaǵan oqý ornynda mashyqtanýshy-oqytýshy bolyp jumys isteıdi. Sol kezdegi naryqtyń qatal zańyna oraı qaladaǵy joǵary oqý oryndary Semeı memlekettik ýnıversıtetine biriktiriledi. Kóp ýaqyt ótpeı pedagogıkalyq ınstıtýt óz aldyna bólinip shyǵady. Mine, sol kezde L. Gotman da muǵalimder ınstıtýtyna aǵa oqytýshy bolyp keledi.
– Mektep qabyrǵasynda júrgen kezimde qoǵamdyq jumystarǵa qatysyp, mektep ómirine tikeleı aralasatynmyn. Kórkemónerpazdar úıirmesiniń belsendi múshesi boldym. Osy jáıtter ınstıtýt qabyrǵasynda júrgende de óz paıdasyn tıgizdi. Jastar arasynda jarqyraı kózge túsip, jastaıymnan qumar bolǵan ónerge degen jaqyndyq meni qoǵamdyq sharalardan tys qaldyrmaıtyn, – degen Lıza Arnoldovna qazaq tilin bilgendiginiń de kóp paıdasy tıgenin qýana ári maqtanyshpen jetkizdi.
– Memlekettik tildi nasıhattaýda jáne ózge ult ókilderiniń qazaq tilin meńgerýine baılanysty ótkiziletin konkýrs-jarystarǵa qatysatynmyn. Jáne únemi jeńimpaz atanyp júrdim. Júldege alǵan syılyqtarym jeterlik. Másele syılyq alýda emes, ózimniń ana tilim dep esepteıtin qazaq tilin nasıhattaýǵa ózge ult ókili bola tura, úles qosqanymdy mártebe sanaıtynmyn.
2007 jyldan pedagogıka ınstıtýtynyń tarıh-fılologııa fakýlteti dekanynyń orynbasary qyzmetin 2011 jylǵa deıin atqarǵan L. Gotman búginde atalǵan oqý ornynyń tárbıe bóliminiń bastyǵy bolyp isteıdi. Bolashaq ustazdardy tárbıeleý isinde usaq-túıek bolmaıdy dep esepteıtin Lıza Arnoldovna Elbasynyń «Qazaqstan-2050» Strategııasy – qalyptasqan memlekettiń jańa saıası baǵyty» atty Joldaýynda aıtylǵan memlekettik tildi damytý týraly pikirin tolyq qoldaıtyndyǵyn, ózi de bul máselege úles qosa beretindigin jetkizdi.
– Germanııadaǵy jıen týystarym tarıhı otanyma shaqyrǵan. Biraq, men úshin kindik qanym tamǵan qazaq jerinen artyq jer, ana tilim dep esepteıtin qazaq tilinen artyq til joq dep esepteımin. 130 ulttyń basyn qosyp, tatýlyq pen dostyqtyń úlgisi, turaqtylyqtyń tutqasy bolyp otyrǵan ata- mekenim – Qazaqstandy basqadaı eshqandaı jerge aıyrbastamaımyn. Kóp ultty demekshi, bizdiń otbasymyzdyń ózinde birneshe ulttyń ókili bar. Jezdelerimniń arasynda orys pen qazaq, tatar da bar. Biraq, basymyz qosylǵanda bárimiz bir úıdiń balasyndaı, bóliný degendi bilmeımiz. Tilegimiz de, júregimiz de bir, – degen Lıza Arnoldovna óz boıyndaǵy otansúıgishtik qasıeti men memlekettik tilge degen qurmetin jas urpaq boıyna sińirý jolynda jemisti eńbek ete bermek.
Narıman JANǴASKIN.
SEMEI.
