Qazaqstan Qarýly Kúshteriniń Bas qolbasshysy nysandy aralaý barysynda 5573 áskerı bóliminiń maket-úlgisimen jáne aqparattyq taqtasymen, jatyn jáne qyzmettik ınfraqurylymdarynyń jaǵdaıymen tanysty. Sondaı-aq, áskerılerdiń oqý-jattyǵý nysandary men qarý-jaraq kórmesin aralady.
Qazaqstan Prezıdenti Ulttyq gvardııanyń komandalyq quramy men áskerı qyzmetkerlermen áńgime barysynda olardyń eldegi turaqtylyqty saqtaýda, azamattar men qoǵamnyń qaýipsizdigin qamtamasyz etýde mańyzdy mindetter atqaryp júrgenderin atap ótti. Sonymen qatar, áskerılerdiń áleýmettik máselelerine jeke toqtaldy.
– Kredıtorlyq qaryzdar ásirese baspanaǵa tólem – óz aldyna jeke másele. Úkimet osy qaryzdardy tolyq óteý boıynsha túpkilikti shara qabyldaýy qajet. Áskerılerdiń áleýmettik máselesi týraly sóz júzinde aıtylyp, is júzinde tıisti mindettemelerdiń oryndalmaýyna jol berilmeý kerek, – dedi Qasym-Jomart Toqaev.
Memleket basshysy Úkimet pen Ishki ister mınıstrligine áskerı bólimshelerdiń jaýyngerlik daıyndyǵyn shyńdap, qurylymdardyń materıaldyq-tehnıkalyq jabdyqtalýyn jaqsartý jóninde tapsyrma berdi.
