Aımaqtar • 25 Mamyr, 2019

Qaraǵandy oblysynda kópbalaly otbasylar baspanaly boldy

796 ret kórsetildi

Jezqazǵan qalasynda Qazaqstan Respýblıkasynyń Eńbek jáne halyqty áleýmettik qorǵaý mınıstrligi, Qaraǵandy oblystyq ákimdigi jáne «Qazaqmys Holdıngi» JShS úshjaqty memorandým kelisimine qol jetkizdi. Mınıstr Berdibek Saparbaev, oblys ákimi Erlan Qoshanov jáne atalǵan kompanııa dırektorlar keńesiniń tóraǵasy Edýard Ogaı qol qoıǵan qujat boıynsha aldaǵy ýaqytta óńirdegi kópbalaly 120 otbasy baspanaǵa ıelik etetin boldy.

Qol qoıý rásimi kezinde oblys ákimi E.Qoshanov Elbasynyń «Árbir qazaqstandyq otbasy júrgizilip jatqan reformalardyń nátıjelerin kúni erteńgi bolashaqta emes, dál búgingi ýaqytta sezinýi tıis», degen sózin alǵa tartty.

– Oblysta 12 myńnan astam kópbalaly otbasy turady. Biz olardyń problemalaryn belsendi túrde sheshýge kiristik. Bul sharýadan bizdiń bıznes-qoǵamdastyqtarymyzdyń tys qalmaǵany qýantady. Áleýmettik belsendi kompanııalardyń biri –  «Qazaqmys» korporasııasy ekenin basa aıtqym keledi, – dedi óńir basshysy. 

Memorandým júktegen mindetter boıynsha, «Qazaqmys» kompanııasy óziniń kópbalaly otbasy bolyp tabylatyn qyzmetkerlerin, sondaı-aq az qamtylǵan eńbekkerleri men jas mamandaryn turǵyn úımen qamtamasyz etetin boldy. Kompanııa áleýmettik jaýapkershilik prınsıpin qoldap, olar úshin 120 páter satyp alý mindetin josparlap otyr. Onyń ishinde 46 otbasy baspanaǵa bıyl ıe bolady. 

Aıta ketken jón, «Qazaqmys» kompanııasy - elimiz boıynsha Elbasy men Memleket basshysynyń kópbalaly jáne áleýmettik az qamtylǵan otbasylaryna kómek qolyn sozý jónindegi bastamasyn alǵashqylardyń biri bolyp qoldap, áleýmettik jaýapkershilik mindetterin naqty oryndaýǵa belsendi túrde kirisken kásiporyn. Qazirgi tańda kásiporyn óziniń qyzmetkerlerine páterler satyp alyp qana qoımaı, sonymen qatar kópbalaly jáne turmysy tómen otbasylarǵa basqa da qajetti kómek túrlerin kórsetip jatyr.

«Qazaqmys Holdıngi» JShS dırektorlar keńesiniń tóraǵasy Edýard Ogaı kompanııa kórsetip otyrǵan áleýmettik kómektiń ataýly jáne júıeli túrde bolatynyn jetkizdi. Sonymen qatar, ol kópbalaly otbasylarǵa kómek kórsetý – sheshimi mindetti túrde tabylýy tıis basty problema ekenin aıtty.

– Jańa páterlerdi tek Jezqazǵan qalasynyń turǵyndary ǵana emes, sonymen qatar Sátbaev, Balqash qalalary men basqa da eldi mekenderdegi bizdiń kásiporyndarda jumys isteıtin qyzmetkerler de alatyn bolady. Sonymen qatar, biz qyzmetkerlerimizdiń otbasylaryna densaýlyqtaryn qalpyna keltirýge, olardyń bilim alýyna kómektesýdi basty mindetterimizdiń biri retinde qarastyramyz, – dedi Edýard Ogaı.

Mınıstr Berdibek Saparbaev halyqtyń áleýmettik osal toptarynyń máseleleri, ásirese, kóp balaly jáne az qamtylǵan otbasylardy, jetim balalardy turǵyn úımen qamtamasyz etý isinde memleket pen bıznestiń tize qosa jumys isteýi kerektigine basa mańyz berdi.

 – Tuńǵysh Prezıdentimizdiń tapsyrmasy boıynsha mınıstrlik bıznes-qoǵamdastyqpen jáne iri kásiporyndarmen birlesip, áleýmettik jobalardy júzege asyrý boıynsha jumys júrgizýde. 2018 jyly jalpy somasy 90 mlrd teńgege 700-den astam memorandým jasaldy. Jalpy, sońǵy 10 jylda bıznes-qurylymdar áleýmettik jaýapkershilik aıasynda áleýmettik jobalarǵa, demeýshilik pen qaıyrymdylyqqa 300 mlrd teńgeden astam qarjy bóldi, – dep atap ótti mınıstr.

Memorandýmǵa qol qoıylǵannan keıin kópbalaly 10 otbasyǵa saltanatty túrde páter kiltteri tabys etildi. Sol kúni Berdibek Saparbaev pen Erlan Qoshanov baspanaly bolǵan Saltanat Nurlanovanyń úıine baryp, qutty bolsyn aıtty. Shıetteı alty balamen jesir qalǵan Saltanat ishi jıhazǵa toly, jóndeýden ótken tórt bólmeli páterge ıe bolǵan eken.

– Buǵan deıin biz páter jaldap turýǵa májbúr boldyq. Qoldaǵy aqsham tek eki bólmeli páterge ǵana jetti. О́zim kásiporynda vahter bolyp jumys isteımin, alty balany jalǵyz tárbıelep otyrmyn, onyń tórteýi kámeletke tolmaǵan. Elbasynyń kópbalaly analarǵa kómek kórsetý týraly tapsyrma bergeni qandaı jaqsy boldy. «Qazaqmys» kompanııasyna aıtar alǵysym sheksiz, – deıdi qýanyshy qoınyna syımaǵan Saltanat aǵynan jarylyp.

Qaraǵandy oblysynda kópbalaly jáne az qamtylǵan otbasylarǵa kómek berý isi aldaǵy ýaqytta da jalǵasyn tabady. Jalpy, jyl sońyna deıin óńirde osy sanattaǵy 560 otbasyn baspanamen qamtamasyz etý josparda bar.

 Qaraǵandy oblysy


Sońǵy jańalyqtar

Bir kúnde 3907 adam koronavırýstan aıyqty

Koronavırýs • Búgin, 09:45

15169 adam koronavırýs juqtyrdy

Koronavırýs • Búgin, 09:17

Uqsas jańalyqtar