«Bolashaq» korporatıvtik qorynyń «О́zińnen basta» jobasy aıasynda Disney ónimderin qazaq tilinde dýblıajdaý jumysy elimizde 2011 jyldan beri júzege asyp keledi. Osy ýaqyt aralyǵynda barlyǵy 29 fılm qazaqsha sóılepti. «Aladdın» de sózsiz sol úzdikterdiń qatarynda.
Baldyrǵandardyń súıikti keıipkerlerin qazaqsha sóıletýge otandyq kıno men teatrdyń jetekshi akterleri tartylypty. Atap aıtar bolsaq, Aladdın beınesin Jastar teatrynyń jas akteri Aısultan Jálıev qazaqshalasa, Jasmın hanshaıym talantty aktrısa Shehnaza Qyzyhanovanyń úninde qazaq kórermenine jol tartty. Al Jyndy belgili teatr jáne kıno akteri, Qazaqstannyń eńbek sińirgen qaıratkeri Dáýren Serǵazın, Jaffardy – Nurlan Álimjan, Sultandy – Qazaqstannyń halyq ártisi Tilektes Meıramov dybystady. Dýblıaj rejısseri – Shah-Murat Ordabaev, mýzykalyq redaktor – Ánel Tokırova.
Buǵan deıin júzege asqan jumystarmen salystyrǵanda fılmdi dybystaǵan akterler úshin «Aladdınniń» jaýapkershiligi de, salmaǵy da zor bolǵan syńaıly. О́ıtkeni shyǵarmashylyq jumys barysynda olardyń akterlik sheberliginen bólek, vokaldyq múmkindikteri de synǵa túsipti. Mýzykalyq túrli janrdyń basyn biriktirgen tańǵajaıyp erteginiń biraz sarsańǵa salǵanyn óner ıeleriniń ózderi de jasyrmady:
– Dýblıaj – akterdiń jan-jaqtylyǵy, ámbebaptylyǵy synǵa túsetin kúrdeli sala ǵoı. Bul týyndyda eń kóp sóıleıtin de, jıi daýys qubyltyp, túrli keıipke enetin de meniń keıipkerim. Jynnyń ár áreketi, qımyly men úshin jekeleı teatr boldy. Tyńǵylyqty izdenisti talap etti. О́ıtkeni ózderińiz kýá bolǵandaı, fılmde Jyn rep te oqıdy, lırıkalyq ánderdi de keńinen kósile shyrqaıdy. Bir amplýadan ekinshisine aýysý úshin akterdiń daýysy da, ishki akterlik daıyndyǵy da myqty bolýy qajet. Osy turǵydan kelgende, «Aladdın» – men úshin tamasha mektep bolǵany anyq», deıdi akter Dáýren Serǵazın.
