Jıyndy ashqan Senat Tóraǵasynyń orynbasary Sergeı Gromov 13-shi otyrystyń qorytyndysy óziniń nátıjesin kórsetkenin eske túsirip ótti. Bizderdiń elderimiz arasyndaǵy parlamentaralyq yntymaqtastyq jańa deńgeıge kóterilip, qoldanystaǵy keıbir zańdardy úılestirý salasynda biraz nátıjege qol jetipti.
– Qazaqstan ekonomıkasynyń negizgi salalarynyń biri – ýran óndirý salasynda eńbek ónimdiligi 10 paıyzǵa ósti. Bul nátıjege biz bir jyl ishinde qol jetkizdik. Sıfrly ekonomıka jobalary Qazaqstan ekonomıkasynyń barlyq salasynda taralyp jatyr. «Qazirgi ýaqytta kóptegen elde sıfrlandyrý damýdyń strategııalyq basymdyǵy bolyp tabylady. Álemdik jetekshi sarapshylardyń boljamdaryna sáıkes, 2020 jylǵa qaraı álemdik ekonomıkanyń tórtten bir bóligi sıfrly bolmaq jáne memleketke, bıznes pen qoǵamǵa tıimdi ózara árekettesýge múmkindik beretin ekonomıkany sıfrlandyrý tehnologııalaryn engizý aýqymdy jáne dınamıkalyq úderiske aınalyp keledi. Bizdiń elderimiz sıfrly ekonomıkada suranysty qalyptastyrý strategııasynan usynystar qalyptastyrý strategııasyna kóshýi jáne muny birlesken kúsh-jigermen jasaýy tıis», dep atap ótti S.Gromov.
Sondaı-aq ol bul jıynǵa Senat pen Federasııa Keńesiniń eki beıindi komıtet músheleri qatysyp otyrǵanyn qaperge saldy.
Federasııa Keńesi Tóraǵasynyń orynbasary Ilıas Ýmahanov basqosýdyń kún tártibindegi másele – sıfrly ekonomıkaǵa kóshýdi eshbir el jeke-dara júrgize jáne nátıjege jete almaıtynyna toqtaldy. Sarapshylardyń pikirinshe, bul jańa tehnologııalyq serpilis bizdiń memleketterimizge HHI ǵasyrdaǵy joǵary tıimdi ekonomıkany qurýǵa jáne álemdegi eń damyǵan eldiń birine aınalýǵa múmkindik beredi. «Sıfrly ekonomıka engizilgen soń basqarý modeli jańa standartynyń tıimdiligi artady jáne shyǵyndardyń azaıýynan ekonomıkaǵa úlken paıda túsedi», dep atap ótti I.Ýmahanov.
Jıynnyń maqsaty halyqaralyq sıfrly tehnologııalardy ómirge dendep engizip, onyń áleýmettik toptar satysyndaǵy halyqtyń ómirine eleýli túrde tıgizetin áserin aıǵaqtaý ekeni bıik minberge shyqqan sóıleýshilerdiń alǵashqy sózderinen-aq anyq baıqaldy. Aıta keteıik, budan buryn tanymal ekonomıst-sarapshy Sergeı Perapechka elimizdiń ekonomıkasyn odan ári sıfrlandyrý kóptegen salanyń damýyna basty faktor bolaryn aıtqan edi. Ol keltirgen málimetke qaraǵanda, sıfrlandyrý salasy boıynsha elimiz jyl ótken saıyn alǵa jyljyp keledi. Al sıfrly ekonomıkaǵa tartylý deńgeıi boıynsha Qazaqstan Reseı, BAÁ, Argentına men Chılı sııaqty eldermen qatar tur eken ári sıfrlandyrý ındeksi boıynsha 0,72 (BUU-nyń 2018 jylǵy málimeti), jahandyq orta deńgeıli kórsetkishten (0,49) joǵary tur. Al elimizdegi eń iri degen kompanııalar arasynda keń jolaqty ınternetke kirý kórsetkishi 45 paıyzdy quraıdy.
