Birinshi kezeńde rallı Aqtaý qalasynan ońtústikke qaraı, oblys ortalyǵynan ońtústik-shyǵysqa qaraı 210 shaqyrym jerde ornalasqan Kendirli kýrortyna bet aldy. Birinshi jarys kúni qyzý qarqynmen ótti. Álemniń úzdik rallıshylary birden alǵa den qoıyp, márege deıin taıtalasty. Qolaıly aýa raıynda avtoshabandozdar jyldamdyqty birden arttyra tústi. Barlyq avtojarysshylar máre syzyǵyn esh qıyndyqsyz jáne tehnıkalyq ınsıdenttersiz sátti kesip ótti.
Qazaqstandyq kezeńniń favorıtteriniń biri, «Dakar» rallı-jarysynyń qazirgi chempıony katarlyq Nasser Saleh Ál-Attııa (Nasser Al-Attiya Team) shtýrmany Mate Bomelmen birge, kóshbasshylyqty birden óz qolyna alyp, qashyqtyqty 2 saǵat 22 mınýt jáne 3 sekýndta baǵyndyryp kósh bastady. Kóshbasshyǵa laıyqty básekeni «Rallı Qazaqstan 2018» jeńimpazy Iаzıd Ál-Radjı (Overdrive Racing) ekıpajy kórsete bildi, Toyota Hilux avtokóliginde Saýd Arabııasynan shyqqan avtojarysshy katarlyqtan nebári eki sekýndqa artta qaldy.
Kólik dóńgelegin aýystyrýǵa joǵaltqan ýaqytqa qaramastan, Naser Saleh ál-Attııa birinshi orynnan kórine bildi. Katardyń shabandozy jarystyń birinshi kúninen alǵan óz áserimen bólisti.
- Komandalyq jumys pen uıymshyldyqtyń arqasynda biz qarsylastarǵa qaraǵanda ár burylysty jyldam ótip, baǵaly sekýndtardy únemdedik. Eger esińizde bolsa, ótken jyly birinshi ýchaskede bizdiń avtokóligimizge aıtarlyqtaı zaqym kelip, biz jarysqa qatysýymyzdy toqtatqan bolatynbyz. Ázirge barlyǵy jospar boıynsha júrýde jáne biz óte optımıstik kózqarastamyz. Qazirgi mindet - barynsha saq bolý jáne kelesi jarys kúninde de kóshbasshylyqty saqtap qalý, dedi Katardyń tájirıbeli rallıshysy Nasser Saleh Ál-Attııa.
Iаzıd Ál-Radjıdiń ekıpajy jarysty tórtinshi bolyp bastady jáne onyń shtýrmany Dırk fon Sıtsıstiń aıtýy boıynsha, dodanyń orta tusynda olar Stefan Peterenseldiń (X-raid MINI JCW Team) ekıpajyn qýyp jetken, odan keıin Vladımır Vasılevtiń (VRT Team) komandasymen ashyq aıqasqa túsken. Nátıjesinde, Iаzıd Ál-Radjı reseılik ujymdy máre syzyǵyna deıin artqa tastaı aldy.
- Biz bastapqy kúnniń qorytyndysy boıynsha óz nátıjemizge rızamyz. Aqtaýdan Kendirlige deıingi trassadan básekelestiktiń naǵyz rýhy men draıvyn sezindik. Alda áli kóp kún jarys, bir mınýtqa da muqııattylyqty joǵaltpaý mańyzdy. Biz tańdaǵan strategııany ustanamyz jáne kóshbasshydan osylaısha qalys qalýdy qysqarta túsemiz, dedi Iаzıd ál-Radjı.
Rallı-reıd boıynsha Álem Kýbogynyń qazirgi chempıony Iаkýb Pshıgonskı (Orlen X-raid Team) Mini John Cooper Works Rally avtokóligimen márege úshinshi bolyp jetti, polshalyq avtoshabandoz ekıpajy birinshi kúnniń jeńimpazynan 3 mınýt jáne 1 sekýndqa artta qaldy.
- Búgingi jarys kúni ádemi tabıǵı peızajdarmen este qaldy. Biz jetinshi bolyp jarysty bastadyq, al máre syzyǵyn úshinshi bolyp kestik. Kúshimizdi durys jumsaı otyryp, turaqtylyqty saqtap, óz nátıjemizdi birtindep jaqsartýymyz qajet, - dedi polıak pıloty Iаkýb Pshıgonskı.
Osy jylǵy Álem Kýbogynyń jalpy esebi boıynsha kóshbasshylardyń biri Stefan Peteransel (X-raid MINI JCW Team) óziniń shtýrmany, ári jubaıymen birge segizinshi orynǵa jaıǵasty. Odan keıingi orynǵa tájirıbeli qazaqstandyq avtojarysshy, «OFF ROAD Kazakhstan» komandasynyń ókili Andreı Cherednıkov óziniń shtýrmany Ignat Falkovpen birge ornalasty. Qazaqstandyq komandanyń kóshbasshydan 26 mınýtqa artta qalǵanyna qaramastan, jarysty joǵary qarqynmen jalǵastyrýǵa daıyn.
Stefan Peteransel úshin birinshi kún sátsiz boldy. Aty ańyzǵa aınalǵan fransýz avtoshabandozy jyldamdyqty údete túsip, Mini John Cooper Works Rally avtokóliginiń dóńgelegin jaryp aldy. Dóńgelekti aýystyrý kóp ýaqyt alǵandyqtan, ol kóshbasshy shabandozdardan aıtarlyqtaı artta qaldy. Fransýz «Rallı Qazaqstanǵa» alǵash ret qatysýda jáne oǵan áli de Mańǵystaýdaǵy jolsyz jerdiń ereksheligine úırenýge týra keledi.
T2 sanatynda eń jaqsy ýaqytty 3 saǵat 9 mınýt jáne 9 sekýnd nátıjesimen taǵy bir Katardyń avtojarysshysy Mohammed Ál-Mıır (Mohammed Nasser Almeer) kórsetti. Ekinshi jáne úshinshi oryndardy túrikmendik shabandozdar, Túrkmenstannyń avtosport federasııasynyń ókilderi ıelendi. Brazılııanyń avtoshabandozy Reınaldo Varela (MONSTER Energy Can-Am) T3 sanatynda birinshi bolyp, 3 saǵat 4 mınýtta márege jetti. Júk kólikteri sanatynda reseılik «Kamaz-master» komandasynan Dmıtrıı Sotnıkovqa teń keler eshkim bolmady, onyń ekıpajy birinshi kúnniń qashyqtyǵyn 3 saǵat 2 mınýt jáne 59 sekýndta júrip ótti.
Seısenbi, 28 mamyr kúni shabandozdardy qumdy alqap arqyly eń qashyq 414 kılometrge sozylǵan aınalma ýchaske kútip tur. Ekinshi kún Senek eldi mekeniniń shyǵysyna qaraı ornalasqan shól arqyly Kendirli bıvýakynda bastalyp, sol jerde óz mejesine jetedi.
Mańǵystaý oblysy
