Kezdesý barysynda taraptar Eýrazııalyq ekonomıkalyq odaqtyń qazirgi jaǵdaıy men damý perspektıvalaryn talqylady.
Nursultan Nazarbaev kóptegen memleket pen uıymnyń Eýrazııalyq ekonomıkalyq odaqpen qarym-qatynas ornatýǵa nıetti ekenin jáne odaqtyń ekonomıkalyq seriktesteriniń aıasyn keńeıtý qajettigin atap ótti.
– Erteń osy jerde Joǵary Eýrazııalyq ekonomıkalyq keńestiń mereıtoılyq otyrysy ótedi. Siz odaqtyń atqarýshy organyna tóraǵalyq etip, júktelgen mindetterdi tabysty atqaryp kelesiz. Alǵa jyljı berýimiz kerek, – dedi Qazaqstannyń Tuńǵysh Prezıdenti.
Tıgran Sarkısıan ekonomıkalyq odaqty damytý isindegi jetistikterge toqtaldy.
– Integrasııany jáne О́zińiz 25 jyl buryn usynǵan ıdeıany tájirıbe júzinde júzege asyrý máselelerin talqylaýǵa múmkindik bergenińiz úshin rızashylyǵymdy bildiremin. Mine, 5 jyl boıy osy jobany iske asyryp kelemiz. О́zińiz shırek ǵasyr buryn kóregendik tanytqan bul bastama elderimiz úshin asa qajet boldy, – dedi Eýrazııalyq ekonomıkalyq komıssııa alqasynyń tóraǵasy.
