Qalanyń eń basty baılyǵy – adamdar, onyń jas turǵyndary. Aqtóbeniń 150 jyldyq bederli belesi kóptegen tarıhı tulǵalar shahardyń mártebesi men dańqyn kótere tústi. Osy oraıda búgingi mereke jas býyn úshin týǵan jerdiń tarıhyn tereńnen tanyp, onyń jańa da jarqyn betterin jazýǵa, Aqtóbeni burynǵydan da ajarly ári ásem qalaǵa aınaldyrý úshin berilgen taptyrmas múmkindik dep bilemiz, – dedi Aqtóbe oblysynyń ákimi Ońdasyn Orazalın 150 jyldyqqa arnalǵan saltanatty rásim kezinde.
Aqtóbe qalasynda tek sońǵy 3-4 jyldyń tóńireginde aýqymdy qurylys jumystary atqaryldy. Aıtalyq, qazirgi kúni qala kórkin odan ári túrlendire túsken kóptegen zamanaýı áleýmettik-turmystyq jáne mádenı nysandar boı kóterdi. Buǵan deıin «Nur Aqtóbe» jáne «Batys» massıvteriniń orny qulazyǵan qý dala bolǵany eshkimge de jasyryn emes. Qaladaǵy qurylys qarqyny joǵary ekeni osy derektiń ózinen de aıqyn kórinedi. Aldaǵy 10-15 jyldyń bederinde Aqtóbe qalasy turǵyndarynyń sany 1 mıllıon adamǵa jetedi dep kútilýde. Sóz joq, bul – bıik meje.
Búgingi kezde alǵa qoıylǵan áleýmettik maqsattarǵa qol jetkizý jáne Aqtóbe qalasynyń ajaryn odan ári asha túsý úshin jan-jaqty jumys júrgizilýde. Onyń deni Aqtóbe qalasynyń 150 jyldyq mereıli datasyna deıin atqarylǵany da úlken mereı. Búgingi tańda Aqtóbe óz turǵyndarynyń sany jóninen elimiz boıynsha besinshi orynda tur. Qala turǵyndarynyń sany 500 myńdyq mejege jaqyndap qalǵanyn aıtqan jón. Qazaqstanda halqynyń sany 1 mıllıonnan asqan úsh megapolıs bar ekeni málim. Budan bes-alty jyl buryn Elbasy Nursultan Nazarbaevtyń tapsyrmasyna sáıkes Aqtóbeni elimizdegi aglomerasııa ortalyǵynyń birine aınaldyrý ári turǵyndary sanyn 1 mıllıonǵa jetkizý mindeti qoıyldy.
Sońǵy jyldary qala halqynyń ishki kóshi-qon jáne tabıǵı ósim esebinen tez óse túsýi Aqtóbe qalasy aýmaǵynda «Astana» jáne «Almaty» dep atalǵan aýdandardyń qurylýyna sebepshi boldy. Aqtóbe qalasynyń sońǵy bas jospary budan úsh jyl buryn qabyldandy. Soǵan sáıkes qazirgi kezde aýqymdy jumys júrgizilip keledi. Jańa turǵyn úı massıvteriniń paıdalanýǵa berilgeni sonyń dáleli. Tutastaı alǵanda, qalada qosymsha taǵy da alty shaǵyn aýdan irge kótermek.
Aqtóbeniń «Batys-3» dep atalatyn jańa qurylys alańynda joba boıynsha 100 myń adam turady. Turǵyndardyń sanyn ósire otyryp, munda negizinen kópqabatty úıler salý tájirıbesi qoldanylýda. Bul úshin jylý, elektrmen qamtý jáne gazdandyrý jóninde arnaıy jobalar túzilgen. Sondaı-aq atalǵan aýdanda bıyl shyǵa bastaǵanyna júz jyl tolyp otyrǵan elimizdiń bas basylymy «Egemen Qazaqstan»-nyń burynǵy redaktory, pýblısıst-ǵalym Saqtaǵan Báıishev atyndaǵy ýnıversıtettiń oqý qalashyǵy turǵyzylmaq. Bir sózben aıtqanda, Aqtóbe aımaǵynda qurylys qarqyny joǵary.
О́tken jyly munda 850 myń sharshy metr turǵyn úı boı kóterse, bıyl onyń kólemi 1 mıllıon sharshy metrge jetkizilmek. Aqtóbeniń 2016 jyly qabyldanǵan bas jospary 2030 jylǵa deıin eseptelgen. Osy ýaqytqa deıin qalanyń ónerkásiptik, agrarlyq jáne logıstıkalyq aýmaǵyn bir-birimen ózara úndes tyǵyz birlestikte odan ári nyǵaıta túsý kózdelgen. Sondaı-aq bas josparǵa sáıkes temir jol vokzaly termınalynyń jańa qurylysyn bastaý uıǵarylǵan.
Aqtóbe qalasynyń 150 jylǵy qarsańynda shahardyń eski aýdandaryn qaıta jańǵyrtý joldary belgilendi. Mundaı aýqymdy jumystarǵa bıýdjet qarajaty jumsalsa, onyń mólsheri tym qomaqty bolmaq. Sondyqtan oǵan ınvestorlyq qarajat kózderin tartý kózdelgen. Sonymen birge jergilikti atqarýshy organdar qurylys kompanııalarymen yntymaqtastyqtyń ózge de nusqalaryn qarastyrýda. Aıtalyq, oblys ortalyǵynda eskirgen, apatty jaǵdaıdaǵy úılerdi súrip tastap, onyń ornyna jańa kópqabatty úıler salý úrdisi bastalyp ketti. Bul jaýapty da kúrdeli ister ınvestorlardyń qatysýymen atqarylady. Onyń bastaýynda «Keremet úı» JShS kompanııasy tur.
Aqtóbe qalasynyń 150 jyldyǵy qarsańynda abattandyrý men kógaldandyrý jumystary jan-jaqty júrgizilgeni de turǵyndarǵa laıyqty tartý boldy deı alamyz. Sonyń ishinde Tuńǵysh Prezıdent atyndaǵy saıabaq mańynda, «Qazaq halqyna myń alǵys» stellasynyń qarsy betinde arka turǵyzylýda. Árıne Aqtóbe qalasyn kórkeıtý men abattandyrý máseleleri onyń 150 jyldyq mereıtoıy sheńberimen shektelip qalmaq emes. Buǵan deıin aıaqtap úlgermegen jobalardy aldaǵy qyrkúıek aıyna deıin tolyq bitirý maqsaty qoıylǵan.
Búginde elimizdegi bolashaǵy zor, múmkindigi joǵary Aqtóbe qalasy mereke qushaǵynda. Sondyqtan sóz túıininde Elbasy aıtqandaı, «Ajaryń atqan tańdaı ashyla bersin, araıly Aqtóbe», demekpiz.
AQTО́BE
