14-22 qyrkúıek aralyǵynda álemniń bilekti balýandary Qazaqstanǵa at basyn burady. Kúres túrlerinen 2019 jylǵy álem chempıonatynda Olımpıada oıyndarynyń lısenzııasy taratylmaq. 2020 jylǵy Tokıo Olımpıadasynyń joldamasyn jeńip alý úshin álemniń myńǵa jýyq balýany kilemge shyǵady dep kútilýde. Álem chempıonatynda 1-shi oryn men 6-shy oryn aralyǵynda jaıǵasqan qazaqstandyq sportshylar tórtjyldyq dodasyna tikeleı joldama alady. Nur-Sultandaǵy álemdik synda kúrestiń úsh túrinen jalpy esebi 108 olımpıada joldamasy óz ıesin tappaq.
«О́tken aptada biz Birikken kúres áleminiń prezıdenti Lalovıch myrzamen kezdesip, álem chempıonatyna daıyndyq barysyn talqyladyq. Daıyndyq kezeńine kóp ýaqyt qalǵan joq, sondyqtan, olımpıada álemindegi iri sporttyq oqıǵaǵa úlken jaýapkershilikpen qaraýymyz kerek. Qazaqstandyq sportshylardy daıyndaý bapkerlerdiń mindeti, al uıymdastyrý komıteti álem birinshiligin joǵary deńgeıde ótkizýge bar kúshin salsa deımin. Bárimiz kúsh biriktirsek, álemdik dodany abyroımen atqaratynymyz sózsiz. Lısenzııalyq álem chempıonatyn ótkizýdiń ózi úlken mártebe. О́z jerimizdegi básekede balýandarymyz jankúıerlerdi qýantady degen úmittemiz», - dedi Qazaqstan UOK basshysy Tımýr Qulybaev.
Qazaqstan UOK prezıdentiniń aıtýynsha, bizdiń elimizdiń álem chempıonattaryn uıymdastyrýdaǵy tájirıbesi mol. Onyń ústine, elordada birneshe ret álemdik deńgeıdegi iri jarystar ótti.
«Bizde aýqymdy sporttyq básekelerdi ótkizý tájirıbesi bar. Jaqynda ǵana Nur-Sultanda shaıbaly hokkeıden álem chempıonaty joǵary deńgeıde ótkizildi. «Barys-Arenaǵa» qarap, ınfraqurylymnyń da daıyn ekenin aıtýǵa bolady. Naqty tapsyrmalar berildi», - dedi jıynda sóz alǵan astana ákimi Baqyt Sultanov.
Álem chempıonatyn uıymdastyrý komıtetiniń jıyny júıeli túrde ótip turady. Maýsym aıynda Birikken kúres áleminiń ókilderi daıyndyq barysymen tereńirek tanysý úshin Nur-Sultanǵa keledi dep kútilýde.
«Bul óte úlken jáne mańyzdy oqıǵa. Biz UWW-men birlese jumys isteýge nıettimiz. Eger bir jaǵadan bas, bir jeńnen qol shyǵaryp, birlese jumys istesek, álem chempıonatyn óte joǵary deńgeıde ótkizemiz», - dedi Qazaqstan Respýblıkasy mádenıet jáne sport mınıstri Arystanbek Muhamedıuly.
Eske sala keteıik, jaqynda Qazaqstan UOK basshysy Tımýr Qulybaev UWW prezıdenti, Halyqaralyq Olımpıada komıtetiniń múshesi Nenad Lalovıchpen kezdesip, kúres túrlerinen elimizde ótetin álem chempıonatyna daıyndyq barysyn talqylady. Kezdesýde UWW prezıdenti Qazaqstannyń álem chempıonatyn joǵary deńgeıde ótkizetinine senim bildirdi.
Sondaı-aq, Qazaqstan UOK basshysy men UWW prezıdenti arasyndaǵy kezdesý barysynda Qazaq Kuresi Halyqaralyq federasııasyn UWW qataryna engizý máselesi oń sheshimin tapty.
Aıta ketelik, lısenzııalyq álem chempıonatyn ótkizý quqyǵyn Qazaqstan byltyrǵy qyrkúıek aıynda jeńip aldy. Álemdik syndy qabyldaýǵa Stambýl qalasy da úmitker atanǵan bolatyn.
