– Elimizdiń úshinshi megapolısine arnaıy kelgen Pıter Foster myrzaǵa alǵysymdy bildiremin. Alǵashqy reıstiń sátti qonýymen quttyqtaımyn. Bul – qala turǵyndary men qonaqtary úshin tamasha jańalyq. О́ıtkeni bizdiń qalamyz arqyly kórshiles oblys pen О́zbekstan azamattary ushady. Endigi shymkenttikter men qala qonaqtary arzan baǵamen Ońtústik astanaǵa usha alady. Áýekompanııasynyń aldaǵy jumystaryna sáttilik tileımin, - dedi qala ákimi.
Bul baǵytta endi 180 oryndy zamanaýı Airbus A320 áýe kemeleri kúnde qatynaıdy. Aıta ketý kerek, Almatydan Shymkentke birinshi reıs tolyp keldi, biraz bılet eń mınımaldy tarıfpen, 10 000 teńgege deıingi baǵamen satylǵan. «Eır Astana» kompanııasynyń prezıdenti Pıter Foster Shymkent elimizdiń respýblıkalyq mańyzǵa ıe megapolısteriniń biri ekenine toqtaldy.
– FlyArystan kompanııasynyń kómegimen jolaýshylar altyn ýaqyttaryn únemdep, loýkostermen sapar shegýdi tańdaıdy degen senimdemin. Aldaǵy ýaqytta reıster men áýe baǵyttary kóbeıedi, - dedi Pıter Foster.
Aıta keteıik, Shymkentke eń tómengi ushaq bıleti 4999 teńgeden bastalady. Júgińiz 5 keliden artyq bolyp, bort ishinde tamaqtanatyn jaǵdaıda bılet baǵasy da arta túsedi. Osy tusta FlyArystan ókilderi jolaýshylarǵa flyarystan.com saıtynda jarııalanǵan tarıf erejelerimen muqııat tanys bolýdy suraıdy.
