Qazaqstannyń Tuńǵysh Prezıdenti osyǵan deıin tórt jyl ishinde Ýnıversıtetti 2600-den astam stýdent bitirgenin aıtty.
– Ýnıversıtet túlekteri – elimizde jáne shetelde suranysqa ıe bolyp otyrǵan básekege qabiletti jas mamandar. Búgin Ýnıversıtetti bitirip jatqan 963 túlektiń 565-i bakalavrıat baǵdarlamasy boıynsha, 378-i magıstratýra jáne 20-y doktorantýra baǵdarlamasy boıynsha bilim aldy. Bakalavrıat baǵdarlamasy boıynsha oqý bitirgenderdiń 40 paıyzdan astamy álemniń úzdik ýnıversıtetterinen shaqyrý alyp, oqýyn jalǵastyrdy, – dedi Elbasy.
Nursultan Nazarbaev stýdentterdiń ǵylymı-zertteý jumysynyń nátıjeleri jáne qol jetkizgen jetistikterin atap ótti.
– Byltyr Ǵylym jáne tehnologııa mektebiniń stýdenttik komandasy Bostonda ótken iGEM gendik-ınjenerlik mashınalar halyqaralyq baıqaýynda altyn medal jeńip aldy. Ǵylymı ázirlemelerdi kommersııalandyrýǵa qatysty iGEM jobasyn atap ótýge bolady, – dedi Qazaqstannyń Tuńǵysh Prezıdenti.
Elbasy Ýnıversıtettiń joǵary bilikti jáne básekege qabiletti kadrlary Qazaqstannyń joǵary tehnologııaly ındýstrııasyn damytýǵa zor úles qosyp otyrǵanyn aıtty.
– 2019 jyl Jastar jyly bolyp jarııalandy. Jastar – elimizdiń qazirgi álemdegi básekege qabilettiliginiń negizgi faktory. Qazaqstannyń bolashaǵy sizderge, sizderdiń bilimderińizge, kúsh-qýattaryńyz ben patrıottyq sezimderińizge baılanysty. Sizder óz áleýetterińiz men múmkindikterińizdi tolyq iske asyrý úshi biz barlyq jaǵdaıdy jasap otyrmyz, – dedi Nursultan Nazarbaev.
Qazaqstannyń Tuńǵysh Prezıdenti «NU – Nazarbaev Ýnıversıteti» brendi álemdik akademııalyq ortada ǵana emes, sonymen qatar memlekettik basqarý, bıznes, medısına, ınnovasııa, IT-tehnologııa salasynda keńinen tanymal boldy.
– Bul bastama Qazaqstanda ǵana emes, sondaı-aq búkil postkeńestik keńistikte ozyq jobaǵa aınalyp, óz salasynda kósh bastady. Ýnıversıtet qysqa merzim ishinde joǵary bilikti kásibı kadrlar daıyndaıtyn, sondaı-aq otandyq ǵylymı zertteýler men ázirlemelerdi damytatyn elimizdiń bedeldi oqý orny retinde qalyptasty. Bilim ordasynyń basty aktıvi – onyń zııatkerlik áleýeti sanalatyn adamdar – oqytýshylar, stýdentter, basqarýshy personal, – dedi Elbasy.
Nursultan Nazarbaev túlekterdi elimiz ben qoǵamymyzdy damytý isine belsene atsalysýǵa shaqyrdy.
– Sizder joǵary bilikti mamandar ǵana emes, sondaı-aq, azamattyq jaýapkershilikti sezinetin qoǵamnyń belsendi músheleri bolýlaryńyz kerek. Oqýdy odan ári jalǵastyrý, el ıgiligi úshin eńbek etý, Qazaqstannyń atynan shetelde bolý nemese óz isińizdi bastaý sııaqty qandaı da bir joldy tańdasańyzdar da sizderge aq jol jáne josparlaryńyzdy tabysty iske asyrýdy tileımin, – dedi Qazaqstannyń Tuńǵysh Prezıdenti.
