Úkimet basshysy óńir aktıviniń qatysýymen jumys keńesin ótkizdi. Mańǵystaý oblysynyń ákimi E. Toǵjanov elimizdiń áleýmettik-ekonomıkalyq damýyn qamtamasyz etý boıynsha qabyldanyp jatqan sharalar týraly baıandady. Bıylǵy 4 aıdyń qorytyndysy boıynsha óńirde ónerkásiptik ónim óndirisiniń kólemi 943,6 mlrd teńgeni qurady, sonyń ishinde 20,1%-ǵa mashına jasaý ósimin qamtamasyz etý esebinen boldy. Negizgi kapıtalǵa ınvestısııalar 121,8 mlrd teńgeni qurady. Jalpy alǵanda, bıyl óńirdiń ınvestısııalyq qorjyny 1,6 trln teńgege 44 ınvestısııalyq jobadan turady, olardyń ishinde 67 mlrd teńgege 22 jobany iske asyrý 2019 jylǵa josparlanǵan.
Keńes barysynda ulttyq ekonomıka vıse-mınıstri E. Alpysov, ındýstrııa jáne ınfraqurylymdyq damý vıse-mınıstri B. Qamalıev, energetıka vıse-mınıstri M. Myrzaǵalıev «Aýyl – El besigi» jobasyn iske asyrý, óńirde kólik ınfraqurylymyn jáne munaı-gaz keshenin damytý týraly baıandady.
«Elbasy Mańǵystaý oblysynyń damýyna erekshe kóńil bóledi», — dep Asqar Mamın, QR Tuńǵysh Prezıdentiniń tapsyrmasy boıynsha «Nurly jol» baǵdarlamasy boıynsha birqatar strategııalyq mańyzy bar iri ınfraqurylymdyq jobalar iske asyrylǵanyn atap ótti, qazirgi tańda atalǵan jobalar elimizdiń tranzıttik jáne eksporttyq áleýetin damytýǵa eleýli túrde yqpal etýde.
Memleket basshysy Qasym-Jomart Toqaevtyń tapsyrmalaryn oryndaý aıasynda óńirde Jańaózen qalasyn áleýmettik-ekonomıkalyq damytýdyń 2025 jylǵa deıingi keshendi josparyn iske asyrý jumystary bastaldy. 67 is-shara josparlanǵan, sonyń nátıjesinde 16,3 myń jumys orny ashylady.
Keńes qorytyndysyn shyǵara otyryp, Asqar Mamın Mańǵystaý oblysy Qazaqstannyń batys qaqpasy ekenin aıtyp, ónerkásip jáne kólik-logıstıka salalaryn, týrızmdi odan ári damytýdyń qajettigin atap ótti.
QR Premer-Mınıstri Asqar Mamın Kaspıı teńiziniń jaǵalaýynda jańa joba salynatyn jerde tas salý rásimine qatysty. Akvaparki, sport alańdary men kongress-holy bar, 2000 orynǵa shaqtalǵan 600 nómiri bar týrıstik keshendi 2020 jyldyń shilde aıynda paıdalanýǵa berý josparlanǵan. Bul jobany iske asyrý oblysta týrızmniń damýyna zor serpin beredi, atalǵan jobada 2000-ǵa jýyq jumys ornyn ashý kózdelgen.
О́ńirde jańa 45 qonaq úı keshenin salý úshin jeke ınvestısııalar tartý jumystary júrgizilip jatyr.
Sonymen qatar, QR Úkimetiniń basshysyna jumys sapary barysynda ınvestısııalar kólemi $1,8 mlrd astam bolatyn «Aqtaý teńiz porty» AEA aımaǵynda metanol men olefın óndirý zaýytyn salý josparlary tanystyryldy. Joba ımportty almastyrýǵa baǵyttalǵan, zaýytta gaz metanolǵa qaıta óńdeledi jáne 40-tan astam ónim ataýyn shyǵarýǵa múmkindik beretin basqa da quraýyshtar shyǵarylady.
